Kunngal Manngal

Laatiino gorko gooto mo genndum yiɗaa ɗum. O huurtini genndiiko, omo yiɗi ɗum duu faa sanne. Kaa so jamma warii o naatii buguuru nduu fuu, debbo oo daasan daago muuɗum faa sella daɗɗa leloo faa weeta. So kanko, gorko oo, o daɗɗii sella fuu; debbo oo naata ley buguuru nduu ŋabba leeso ngoo leloo faa weeta. Ɓe njokkiri non faa goriraaɗo oo mettaa. O lamndii debbo oo. O haaldi e makko faa o ronkani oon. Batte majjum ɲannde wootere gorko oo ɓornii paaɗe muuɗum ye'i ɗo debbo mawɗo gooto. O haaltanii on ko woni hakkunde makko e genndiiko. Debbo mawɗo oo wii gorko oo hoota leloo law. O leloo ley buguuru nduu yalla genndiraaɗo oo ana yalta yaasin. Kaa ko o nani fuu pati o wiya fay huunde, debbo oo tawayan mo ley suudu to. Nden kaa o yalta o wiya “karja!” faa cile tati. Gorko oo wii wooɗi, hooti cuuɗi. O yottii wakkati kiraaɗe. Goriraaɗo oo hiirti, naati fukki. Genndiraaɗo oo daasi daago muuɗum fukkoyi sella. Homo fuu ɗaanii. Hejjere jamma, debbo oo ana lelii faa gurbiti immii, sabu o nani gullaaɗe kulɓiniiɗe. O udditi noppi makko o heɗi no feewi. Omo nana kuungal manngal gootal mbiyoowal: gummagummagooss! Ɗum ya'an tan iɗum ɓado warde. Gilla debbo oo ana ɲoƴƴa ɓernde muuɗum faa o ronki muɲude. Kulol bonngol hippii dow makko. O dogi yaade buguuru baabiiko. O yimi: Babba a nanii naa, babba guuro a nanii naa kuungal ngal wii dee, kuungal manngal ngal wii dee gummagummagooss! Babbiraaɗo oo nootii: Walaa koo mbaawu-mi. Yaa to gora! Debbo oo salii. O dogi yaade to inniiko. O yimi: Inne a nanii naa Inne guuro a nanii naa Kuungal ngal wii dee Kuungal manngal ngal wii dee Gummagummagoss! Inniraaɗo oo nootii: Walaa koo mbaawu-mi. Yaa to gora! Debbo oo salii. O ye'i to banndiiko gorko o yimi: Sammba a nanii naa Sammba inne a nanii naa Kuungal ngal wii dee Kuungal manngal ngal wii dee Gummmagummmagooss! Banndiraaɗo gorko oo nootii: Walaa koo mbaawu-mi. Yaa to gora! Joonin kaa o fuɗɗi yiide kuungal ngal ana ɓawla warde ɗo woɗɗi, engal wulla gummagummagooss! Kulol makko ngol ɓeydii faa omo siɲɲa hono leembol lekki. Debbo oo dogi wirfaade to gorum ton. Kuungal ngal ana doga caggal makko ana wulla warde. O dogi ko o waaawi fuu faa damal buguuru nduu o wii: Hey a nanii naa, Kuungal ngal wii dee Kuungal manngal ngal wii dee Gummagummagooss! Saaye. Fay gooto nootaaki. Gorko oo hinnii lelaade ko muuɗum. O murtinkinii. Kuungal ngal wulli semmbe gummagummagooss! Debbo oo ana darii damal buguuru nduu. O yii kuungal ngal faa gasi. Engal juuti faa hoore maggal ana mema kammu. Yiite ana yalta e gite maggal kaɲe kunugal maggal fuu. Debbo oo naati buguuru nduu dari baŋŋe leeso ngoo fonnde hoore goriraaɗo oo. O yimi: Maani a nanii naa, Kuungal ngal wii dee Kuungal manngal ngal wii dee Gummagummagooss! Goriraaɗo oo ɓeydi murtinkinaade. O ɲoofii hono baddel ley lelnde makko. Debbo oo wii kasen: Unhuu a nanii naa unhuu guuri a nani naa, kuungal ngal wii dee kuungal manngal ngal wii dee gummagummagooss! Goriraaɗo oo waɗi hono maataali. Kuungal ngal wari faa ɗo daago debbo oo daɗɗinoo ɗo. Ngal wulli: gummagummagoooooossssss! Pette yiite caami ana ɲaara dow leydi. Debbo oo suuri ŋabbi dow leeso gorum, suddii ley suddamaare, ɲoofii gere makko wii: Giɗo a nanii naa, Giɗowel am a nanii naa kuungal ngal wii dee kuungal ngal manngal ngal wii dee gummmagummagooss! Nden goriiraaɗo oo gurbitii so immii, yalti sella damal buguuru nduu wii nde tati: Karja! Karja! Karja! Kuungal ngal dogi soƴƴii ladde. Kuyan e seyo nangi ɓernde gorko oo sabu omo yiɗi genndiiko faa sanne. Nii debbo mawɗo oo waɗi so totti goriraaɗo oo gennda muuɗum.