𞤃𞤭𞤧𞤪𞤢 𞤩𞤮𞥅𞤴𞤯𞤮

𞤃𞤭𞤧𞤪𞤢 𞤩𞤮𞥅𞤴𞤯𞤮 𞤳𞤮 𞤧𞤭𞤱𞤭𞤤 𞤩𞤮𞥅𞤴𞤯𞤮 𞤼𞤮 𞤊𞤵𞤯𞤲𞤢𞥄𞤲'𞤺𞤫-𞤪𞤫𞤱𞤮 𞤀𞤬𞤪𞤭𞤳. 𞤐'𞤁𞤫 𞤩𞤵𞤪𞤭 𞤸𞤫𞥅𞤱𞤣𞤫 𞤳𞤮 𞤫 𞤣𞤢𞥄𞤲'𞤣𞤫 𞤤𞤫𞤧 𞤥𞤢𞥄𞤴𞤮 𞤐𞤭𞥅𞤤⹁ 𞤼𞤢𞤱𞤢𞥄𞤲'𞤣𞤫 𞤫 𞤲𞤮𞤳𞥆𞤵 𞤦𞤭𞤴𞤫𞤼𞤫𞥅𞤯𞤮 𞤃𞤭𞤧𞤪𞤢 𞤸𞤢𞤲𞤣𞤫 𞤮𞥅. 𞤔𞤢𞥄𞤩𞤭-𞤸𞤢𞥄𞤯𞤼𞤭𞤪𞤣𞤫 𞤃𞤭𞤧𞤪𞤢 𞤩𞤮𞥅𞤴𞤯𞤮 𞤤𞤮𞤥𞤼𞤭𞥅 𞤃𞤭𞤧𞤪𞤢 𞤳𞤮 𞤢𞤣𞤭𞥅 𞤼𞤢𞥄𞤪𞤭𞥅𞤲'𞤣𞤭⹁ 𞤩𞤫 𞤳𞤢𞤱𞤪𞤭 𞤸𞤫𞤣𞥆𞤫 𞤸𞤭𞤼𞤢𞥄𞤲'𞤣𞤫 𞥓𞥑𞥐𞥐 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄. (𞤫 𞤬𞤢𞤱𞤢𞥄𞤣𞤫 𞤫 𞤤𞤭𞤥𞤼𞤮 𞤃𞤭𞤧𞤪𞤢) [𞥑] 𞤫 𞤣𞤫𞤲𞤼𞤢𞤤 𞤨𞤮𞤤𞤭𞤼𞤭𞤳 𞤃𞤭𞤧𞤪𞤢 𞤼𞤮𞥅𞤱𞤯𞤮 𞤫 𞤤𞤫𞤧𞤤𞤫𞤧𞤮 𞤫 𞤤𞤫𞤧 𞤲'𞤶𞤭𞥅𞤥𞤢𞥄𞤲'𞤣𞤭 𞤃𞤫𞤲𞤫𞤧 (𞤭𞤲𞤢 𞤸𞤫𞥅𞤱𞤭 𞤲𞤢𞤲𞤣𞤭𞤪𞤫𞥅𞤣𞤫 𞤫 𞤐𞤢𞤪𞤥𞤫𞤪). [𞥒] 𞤁𞤢𞥄𞤪𞤼𞤮𞤤 𞤃𞤭𞤧𞤪𞤢 𞤩𞤮𞥅𞤴𞤲'𞤺𞤮𞤤 𞤲'𞤺𞤮𞤤 𞤬𞤵𞤯𞥆𞤭𞥅 𞤳𞤮 𞤫 𞤤𞤢𞥄𞤥𞤤𞤢𞥄𞤥𞤵𞥅𞤶𞤭 𞤣𞤢𞤪𞤼𞤭𞥅𞤯𞤭⹁ 𞤼𞤢𞤱𞤭 𞤭𞤲𞤢 𞤲'𞤶𞤭𞤤𞥆𞤮𞤲'𞤣𞤭𞤪𞤭 𞤫 𞤴𞤮𞤲𞤼𞤢𞥄𞤶𞤭 𞤯𞤭 𞤲'𞤺𞤮𞤲𞤢𞥄 𞤣𞤢𞤪𞤼𞤭𞤲𞤢𞥄𞤯𞤭⹁ 𞤯𞤭 𞤲'𞤦𞤭𞤴𞤢𞤼𞤫𞥅 𞤳𞤮 "𞤱𞤢𞤳𞥆𞤢𞤼𞤭𞥅𞤶𞤭 𞤸𞤢𞤳𞥆𞤵𞤲'𞤣𞤫𞥅𞤶𞤭". 𞤂𞤢𞥄𞤥𞤵𞥅𞤶𞤭 𞤷𞤫𞥅𞤪𞤼𞤵𞤯𞤭 𞤯𞤭𞥅 𞤭𞤲𞤢 𞤷𞤫𞥅𞤪𞤼𞤭 𞤫 𞤷𞤢𞤼𞤫 𞤼𞤢𞤼𞤭 : 𞤂𞤢𞥄𞤥𞤵 𞤩𞤮𞥅𞤴𞤯𞤮 𞤫 𞤬𞤵𞤯𞥆𞤮𞥅𞤣𞤫 𞤶𞤢𞤥𞤢𞥄𞤲𞤵 𞤲'𞤶𞤢𞤥𞤲'𞤣𞤭⹁ 𞤂𞤢𞥄𞤥𞤵 𞤸𞤢𞤳𞥆𞤵𞤲'𞤣𞤫𞥅𞤶𞤮 𞤫 𞤶𞤢𞤥𞤢𞥄𞤲𞤵 𞤲'𞤶𞤢𞤥𞤲'𞤣𞤭 𞤸𞤢𞤳𞥆𞤵𞤲'𞤣𞤫𞥅𞤶𞤮 𞤱𞤢𞤤𞥆𞤢 𞤂𞤢𞥄𞤥𞤵 𞤳𞤫𞤧𞤮 𞤫 𞤴𞤮𞤲𞤼𞤢 𞤲'𞤶𞤢𞤥𞤲'𞤣𞤭 𞤷𞤢𞤳𞥆𞤭𞤼𞤭𞥅𞤲'𞤣𞤭.

𞤉𞤶𞤭𞤨𞤼 𞤩𞤮𞥅𞤴𞤯𞤮 𞤮𞥅 𞤴𞤫𞤼𞥆𞤭𞥅𞤥𞤢 𞤯𞤮 𞤣𞤮𞥅𞤤𞤫 𞤥𞤵𞤥 𞤩𞤵𞤪𞤭 𞤥𞤢𞤱𞤲𞤵𞤣𞤫 𞤫 𞤧𞤢𞤸𞤢𞥄 𞤂𞤢𞥄𞤥𞤵 𞤳𞤫𞤧𞤵 𞤲'𞤺𞤵𞥅⹁ 𞤤𞤢𞥄𞤥𞤭𞥅 𞤳𞤮 𞤩𞤵𞤪𞤭 𞤸𞤫𞥅𞤱𞤣𞤫 𞤫 𞤐𞤵𞤦𞤭 𞤫 𞤬𞤫𞤷𞥆𞤫𞤪𞤫 𞤥𞤢𞤱𞤲'𞤣𞤫 𞤫 𞤂𞤫𞤾𞤢𞤲𞤼. 𞤕𞤢𞤺𞥆𞤢𞤤 𞤮𞥅𞤯𞤮𞥅 𞤧𞤢𞤸𞤢𞥄⹁ 𞤲'𞤣𞤫 𞤲𞤢𞥄𞤼𞤭 𞤫 𞤴𞤮𞤲𞤼𞤢 𞤽𞤢𞤳𞥆𞤫𞥅𞤲'𞤣𞤫 𞤧𞤫𞥅𞤯𞤢 𞤧𞤫𞥅𞤯𞤢. 𞤉 𞤲'𞤣𞤫𞤪 𞤣𞤢𞥄𞤪𞤼𞤮𞤤 𞤥𞤵𞤥⹁ 𞤃𞤭𞤧𞤪𞤢 𞤩𞤮𞥅𞤴𞤯𞤮 𞤴𞤢𞤲𞤭 𞤱𞤢𞤤𞥆𞤢 𞤸𞤫𞤩𞤼𞤭𞥅 𞤤𞤫𞤴𞤯𞤫𞥅𞤤𞤫 𞤳𞤫𞥅𞤱𞤯𞤫⹁ 𞤭𞤲𞤢 𞤶𞤫𞤴𞤢𞥄 𞤸𞤫𞥅𞤲 𞤖𞤭𞤳𞤧𞤮𞤧 𞤫𞤲⹁ 𞤐𞤵𞤦𞤭𞤴𞤢𞤲𞤳𞤮𞥅𞤩𞤫⹁ 𞤀𞤧𞥆𞤭𞤪𞤭𞤴𞤢𞤲𞤳𞤮𞥅𞤩𞤫⹁ 𞤆𞤫𞤪𞤧𞤭𞤴𞤢𞤲𞤳𞤮𞥅𞤩𞤫 𞤀𞤳𞤫𞤥𞤫𞤲𞤭𞤣 𞤫𞤲⹁ 𞤫 𞤃𞤢𞤧𞤫𞤣𞤮𞤲𞤭𞤴𞤢𞤲𞤳𞤮𞥅𞤩𞤫 𞤫 𞤤𞤢𞥄𞤥𞤵 𞤀𞤤𞤫𞤳𞤧𞤢𞤲𞤣𞤢𞤪 𞤥𞤢𞤱𞤯𞤮. 𞤂𞤢𞥄𞤥𞤵 𞤆𞤼𞤮𞤤𞤫𞤥𞤢𞤭𞤷 𞤘𞤫𞤪𞤫𞤳⹁ 𞤧𞤮𞤧𞤢𞥄 𞤳𞤮 𞤷𞤢𞤺𞥆𞤢𞤤 𞤥𞤢𞥄𞤴𞤣𞤫 𞤀𞤤𞤫𞤳𞤧𞤢𞤲𞤣𞤫𞤪𞤫⹁ 𞤤𞤢𞥄𞤥𞤭𞥅𞤥𞤢 𞤸𞤢𞥄 𞤸𞤭𞤼𞤢𞥄𞤲'𞤣𞤫 𞥓𞥐 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄. 𞤑𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄⹁ 𞤲'𞤣𞤫⹁ 𞤫 𞤤𞤫𞤧 𞤲'𞤶𞤭𞥅𞤥𞤢𞥄𞤲'𞤣𞤭 𞤑𞤭𞤤𞤭𞤴𞤮𞤨𞤢𞤼𞤪𞤢⹁ 𞤲'𞤣𞤫 𞤴𞤢𞤲𞤭 𞤫 𞤤𞤢𞥄𞤥𞤵 𞤈𞤮𞥅𞤥⹁ 𞤲'𞤣𞤫 𞤱𞤮𞤲𞤼𞤭 𞤣𞤭𞥅𞤱𞤢𞥄𞤲 𞤈𞤮𞥅𞤥. [𞥓] 𞤃𞤭𞤧𞤪𞤢 𞤱𞤮𞤲𞤭 𞤳𞤮 𞤫 𞤤𞤫𞤧 𞤲'𞤶𞤭𞥅𞤥𞤢𞥄𞤲'𞤣𞤭 𞤈𞤮𞥅𞤥 𞤸𞤢𞥄 𞤳𞤭𞤼𞤢𞥄𞤤𞤫 𞥖𞥔𞥐 𞤷𞤢𞤺𞥆𞤢𞤤 𞤋𞥅𞤧𞤢𞥄. 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄⹁ 𞤲'𞤣𞤫 𞤳𞤢𞤤𞤭𞤬𞤢𞥄𞤲'𞤣𞤭 𞤈𞤢𞥃𞤭𞤣𞤵𞤲 𞤸𞤫𞤩𞤼𞤭 𞤲'𞤣𞤭.

𞤐𞤢𞤬𞤮𞥅𞤪𞤫 𞤶𞤢𞤽𞤣𞤫 𞤃𞤭𞤧𞤪𞤢 𞤩𞤮𞥅𞤴𞤲'𞤣𞤫 𞤭𞤲𞤢 𞤶𞤫𞤴𞤢𞥄 𞤫 𞤳𞤮 𞤢𞤣𞥆𞤢𞤲𞤭 𞤯𞤵𞤥 𞤱𞤢𞥄𞤱𞤣𞤫 𞤸𞤵𞥅𞤼𞤮𞤪𞤢𞥄𞤣𞤫 𞤲'𞤺𞤮𞤲𞤳𞤢𞥄𞤶𞤭 𞤬𞤢𞤤𞤲'𞤣𞤫 𞤐𞤭𞥅𞤤 𞤲'𞤺𞤢𞤥 𞤲'𞤣𞤫𞤥𞤢. 𞤋𞤤𞤢𞤥𞤶𞤭 𞤼𞤫𞤧𞤳𞤢𞥄𞤯𞤭 𞤫 𞤲'𞤣𞤭𞤴𞤢𞤥 𞤩𞤵𞥅𞤩𞤯𞤢𞤥 𞤫 𞤲'𞤣𞤫𞤪 𞤬𞤢𞤤𞤲'𞤣𞤫 𞤩𞤵𞥅𞤩𞤲'𞤣𞤫 𞤲'𞤣𞤫𞥅⹁ 𞤭𞤲𞤢 𞤢𞤣𞥆𞤢𞤲𞤢 𞤯𞤵𞤥 𞤫𞤲 𞤺𞤫𞤧𞤫 𞤩𞤵𞤪𞤯𞤫 𞤸𞤫𞥅𞤱𞤣𞤫⹁ 𞤯𞤵𞤥 𞤲𞤮𞥅𞤲 𞤭𞤲𞤢 𞤱𞤢𞤤𞥆𞤭𞤼𞤢 𞤫 𞤴𞤭𞤥𞤩𞤫 𞤩𞤵𞤪𞤩𞤫 𞤸𞤫𞥅𞤱𞤣𞤫⹁ 𞤳𞤢𞤥 𞤫 𞤰𞤫𞤤𞥆𞤭𞤼𞤢𞥄𞤪𞤫 𞤪𞤫𞤲𞤣𞤮 𞤫 𞤨𞤭𞤲𞤢𞤤. 𞤉 𞤲'𞤣𞤫𞤪 𞤲'𞤺𞤢𞤤𞤵 𞤲'𞤺𞤵𞥅⹁ 𞤲'𞤶𞤵𞤩𞥆𞤵𞤣𞤭 𞤲'𞤣𞤭𞥅 𞤭𞤲𞤢 𞤶𞤮𞤳𞥆𞤭 𞤫 𞤰𞤫𞤤𞥆𞤭𞤼𞤣𞤫 𞤲'𞤶𞤵𞤤𞤢𞥄𞤺𞤵 𞤫 𞤲'𞤣𞤫𞤪 𞤬𞤢𞤤𞤲'𞤣𞤫 𞤲'𞤣𞤫𞥅 𞤫 𞤣𞤭𞥅𞤱𞤢𞤲𞤵𞥅𞤶𞤭 𞤶𞤫𞥅𞤪𞤫𞥅𞤲'𞤣𞤫 𞤼𞤢𞥄𞤪𞤭𞥅𞤯𞤭 𞤯𞤭𞥅⹁ 𞤫 𞤰𞤫𞤤𞥆𞤭𞤼𞤺𞤮𞤤 𞤦𞤭𞤲𞤣𞤮𞤤 𞤳𞤫𞥅𞤪𞤭𞥅𞤯𞤮⹁ 𞤫 𞤴𞤵𞤩𞥆𞤭𞤲'𞤣𞤫 𞤫𞤩𞥆𞤢𞥄𞤯𞤫 𞤥𞤢𞤸𞤲'𞤺𞤮 𞤫 𞤲'𞤣𞤫𞤥𞤢⹁ 𞤫 𞤲'𞤶𞤵𞤤𞤢𞥄𞤺𞤵 𞤫 𞤣𞤭𞥅𞤱𞤢𞤲𞤵𞥅𞤶𞤭 𞤼𞤢𞥄𞤪𞤭𞥅𞤯𞤭 𞤯𞤭𞥅 𞤫 𞤳𞤮𞤲𞤵 𞤲'𞤺𞤵𞥅 𞤭𞤲𞤢 𞤴𞤭𞤯𞤭 𞤼𞤢𞤦𞤭𞤼𞤭𞤲'𞤣𞤫 𞤲'𞤶𞤭𞥅𞤥𞤢𞥄𞤲'𞤣𞤭 𞤉𞤶𞤭𞤨𞤼. 𞤃𞤮𞤰𞥆𞤭𞤲'𞤣𞤫 𞤫 𞤴𞤵𞤩𞥆𞤭𞤲'𞤣𞤫 𞤯𞤫𞥅𞤲 𞤺𞤮𞤤𞥆𞤫 𞤳𞤮 𞤦𞤭𞤪𞤮𞥅𞤶𞤭 𞤦𞤭𞤲𞤣𞤭𞤼𞤢𞤺𞤮𞤤 𞤥𞤢𞤱𞤲'𞤺𞤮𞤤⹁ 𞤢𞤪𞤣𞤭𞥅𞤩𞤫 𞤣𞤭𞥅𞤲𞤫 𞤫 𞤲'𞤶𞤵𞤩𞥆𞤵𞤣𞤭 𞤤𞤢𞥄𞤥𞤵 𞤫 𞤲'𞤣𞤫𞤪 𞤲'𞤶𞤭𞥅𞤥𞤢𞥄𞤲'𞤣𞤭 𞤬𞤭𞤪𞤢𞥄𞤱𞤲𞤢⹁ 𞤼𞤢𞤱𞤭 𞤭𞤲𞤢 𞤯𞤢𞤩𞥆𞤭 𞤺𞤮𞤤𞥆𞤮𞤲'𞤣𞤭𞤪𞤢𞤤 𞤫 𞤲'𞤺𞤮𞥅𞤼𞤢𞥄𞤺𞤵 𞤤𞤫𞤻𞤮𞤤 𞤃𞤭𞤧𞤪𞤢 𞤫 𞤲'𞤣𞤫𞤪 𞤲'𞤺𞤮𞤲𞤳𞤢 ‘’𞤲'𞤶𞤵𞤩𞥆𞤵𞤣𞤭 𞤲'𞤶𞤵𞤩𞥆𞤵𞤣𞤭 𞤣𞤭𞥅𞤲𞤫𞥅𞤶𞤭’’. [𞥔]

𞤑𞤮 𞤸𞤫𞥅𞤱𞤭 𞤫 𞤺𞤮𞤤𞥆𞤫 𞤃𞤭𞤧𞤪𞤢𞤲𞤢𞥄𞤩𞤫 𞤩𞤮𞥅𞤴𞤩𞤫 𞤭𞤲𞤢 𞤶𞤫𞤴𞤢𞥄 𞤸𞤫𞥅𞤲 : 𞤰𞤫𞤤𞥆𞤭𞤼𞤣𞤫 𞤳𞤢𞥄𞤰𞤫⹁ 𞤱𞤭𞤯𞤼𞤮𞥅𞤶𞤭⹁ 𞤫 𞤳𞤢𞤪𞤢𞤤𞥆𞤢𞥄𞤺𞤢𞤤 𞤥𞤢𞤸𞤲'𞤺𞤮 𞤦𞤢𞥄𞤱𞤲'𞤺𞤢𞤤 𞤥𞤢𞤸𞤣𞤫 𞤨𞤭𞤪𞤢𞤥𞤭𞤣𞤵𞥅𞤶𞤭 𞤥𞤢𞤱𞤯𞤭⹁ 𞤼𞤫𞤥𞤨𞤤𞤫𞥅𞤶𞤭⹁ 𞤫 𞤮𞤦𞤫𞤤𞤭𞤧𞤳 𞤫𞤲 ⁏ 𞤲'𞤶𞤵𞤩𞥆𞤵𞤣𞤭 𞤸𞤭𞥅𞤧𞤢⹁ 𞤲'𞤶𞤵𞤩𞥆𞤵𞤣𞤭 𞤧𞤢𞤬𞤢𞥄𞤪𞤢 𞤺𞤮𞤤𞥆𞤮𞤪𞤲'𞤣𞤭 𞤫 𞤦𞤢𞥄𞤱𞤲'𞤣𞤭⹁ 𞤲'𞤶𞤵𞤩𞥆𞤵𞤣𞤭 𞤲'𞤣𞤭𞤴𞤢𞤥 𞤫 𞤳𞤢𞤪𞤢𞤤𞥆𞤢𞥄𞤺𞤢𞤤 𞤨𞤫𞥅𞤱𞤲𞤵𞤺𞤮𞤤 𞤲'𞤣𞤫𞤥𞤢⹁ 𞤤𞤢𞥄𞤲𞤢𞥄𞤶𞤭 𞤨𞤤𞤢𞤲𞤳 𞤺𞤢𞤣𞤢𞤲𞤭 𞤢𞤲𞤣𞤢𞥄𞤯𞤭⹁ [𞥕] 𞤳𞤢𞤪𞤢𞤤𞥆𞤢𞥄𞤺𞤢𞤤 𞤤𞤫𞤴𞤣𞤭 𞤫 𞤺𞤭𞤤𞤢𞥄𞤧 𞤉𞤶𞤭𞤨𞤼⹁ 𞤧𞤭𞤬𞤢𞥄𞤶𞤭 𞤦𞤭𞤲𞤣𞤮𞤤 𞤳𞤫𞤧𞤭 𞤫 𞤲𞤢𞤲𞤮𞤲'𞤣𞤭𞤪𞤢𞤤 𞤶𞤢𞤥 𞤺𞤢𞤣𞤢𞤲𞤢𞤤 𞤺𞤢𞤲𞤣𞤢𞥄𞤲'𞤺𞤢𞤤⹁ 𞤦𞤢𞤯𞤢𞥄𞤲'𞤺𞤢𞤤 𞤫 𞤖𞤭𞤼𞤭 𞤫𞤲 . [𞥖] 𞤃𞤭𞤧𞤪𞤢 𞤩𞤮𞥅𞤴𞤯𞤮 𞤢𞤷𞥆𞤭 𞤳𞤮 𞤲'𞤣𞤮𞤲𞤵 𞤣𞤵𞥅𞤥𞤮𞤼𞤮𞥅𞤲'𞤺𞤵. 𞤐𞤢𞥄𞤤𞤢𞤲𞤳𞤢𞥄𞤺𞤢𞤤 𞤥𞤢𞤺𞥆𞤢𞤤 𞤫 𞤥𞤢𞤸𞤣𞤭 𞤥𞤢𞤺𞥆𞤢𞤤 𞤭𞤲𞤢 𞤲'𞤶𞤵𞥅𞤼𞤫𞥅 𞤲𞤮 𞤬𞤫𞥅𞤱𞤭⹁ 𞤳𞤮 𞤩𞤮𞥅𞤴𞤭 𞤥𞤢𞤺𞥆𞤢𞤤 𞤲𞤢𞤱𞤼𞤢𞥄 𞤫 𞤳𞤢𞤤𞤢 𞤲𞤮𞤳𞥆𞤵𞥅𞤶𞤭 𞤱𞤭𞤲𞤣𞤫𞤪𞤫 𞤲'𞤣𞤫𞥅. 𞤑𞤮𞤧𞤢𞤥 𞤯𞤢𞤥 𞤥𞤢𞤱𞤯𞤢𞤥 𞤭𞤲𞤢 𞤩𞤵𞥅𞤩𞤲𞤢 𞤥𞤭𞥅𞤶𞤮𞥅𞤶𞤭 𞤴𞤢𞤸𞤮𞥅𞤩𞤫 𞤫 𞤱𞤭𞤲𞤣𞤮𞥅𞤩𞤫 𞤬𞤮𞤼𞤣𞤫 𞤣𞤵𞥅𞤩𞤭 𞤵𞤶𞤵𞤲𞥆𞤢𞥄𞤶𞤫. 𞤚𞤫𞤣𞥆𞤵𞤲'𞤺𞤢𞤤 𞤳𞤫𞤧𞤢𞤤 𞤱𞤮𞤲𞤢𞤲'𞤣𞤫 𞤳𞤮 𞤩𞤮𞥅𞤴𞤭 𞤫 𞤰𞤫𞥅𞤱𞤲'𞤣𞤮𞤪𞤯𞤫 𞤫 𞤲'𞤣𞤫𞤪 𞤬𞤵𞤯𞥆𞤮𞥅𞤣𞤫 𞤶𞤢𞤥𞤢𞥄𞤲𞤵 𞤸𞤢𞤲𞤣𞤫 𞤮𞥅⹁ 𞤳𞤮 𞤌𞤪𞤮𞤨𞤲𞤢𞥄𞤩𞤫 𞤫 𞤃𞤭𞤧𞤪𞤢𞤲𞤢𞥄𞤩𞤫 𞤲'𞤦𞤢𞤯𞤭⹁ 𞤢𞤣𞥆𞤢𞤲𞤭 𞤩𞤫 𞤶𞤢𞤲𞤺𞤵𞤣𞤫 𞤺𞤢𞤲𞤣𞤢𞤤 𞤫 𞤶𞤢𞤽𞤣𞤫 𞤃𞤭𞤧𞤪𞤢 𞤫 𞤩𞤫𞤴𞤣𞤢𞥄𞤣𞤫 𞤬𞤢𞥄𞤥𞤣𞤫 𞤲'𞤣𞤮𞤲𞤵 𞤨𞤭𞤲𞤢𞤤 𞤥𞤵𞤥 𞤫𞤲.

𞤨𞤫𞤰𞥆𞤮𞤤

𞤃𞤢𞥄𞤴𞤮 𞤐𞤭𞥅𞤤 𞤱𞤮𞤲𞥆𞤮𞥅 𞤳𞤮 𞤤𞤢𞥄𞤱𞤮𞤤 𞤲'𞤺𞤵𞥅𞤪𞤲'𞤣𞤢𞤥 𞤣𞤭𞥅𞤱𞤢𞥄𞤲 𞤮𞥅 𞤫 𞤲'𞤣𞤫𞤪 𞤳𞤮 𞤩𞤵𞤪𞤭 𞤸𞤫𞥅𞤱𞤣𞤫 𞤫 𞤣𞤢𞥄𞤪𞤼𞤮𞤤 𞤢𞥄𞤣𞤫𞥅. [𞥘] 𞤂𞤢𞥄𞤦𞤭 𞤐𞤭𞥅𞤤 𞤯𞤭 𞤩𞤵𞥅𞤩𞤯𞤭 𞤯𞤭𞥅 𞤲'𞤣𞤮𞤳𞥆𞤭 𞤢𞥄𞤣𞤫𞥅 𞤫𞤲 𞤬𞤢𞤪𞤼𞤢𞤽𞥆𞤫 𞤰𞤫𞤤𞥆𞤭𞤼𞤣𞤫 𞤬𞤢𞤺𞥆𞤵𞤣𞤵 𞤲'𞤣𞤫𞤥𞤢 𞤶𞤮𞥅𞤯𞤭𞥅𞤯𞤮 𞤫 𞤪𞤫𞤲𞤣𞤮 𞤩𞤵𞤪𞤲'𞤺𞤮 𞤧𞤮𞤬𞤼𞤵𞤣𞤫⹁ 𞤲'𞤺𞤮 𞤱𞤮𞤲𞤼𞤭 𞤳𞤢𞥄𞤰𞤫𞤤 𞤺𞤮𞤲𞤺𞤫𞤤 𞤫 𞤣𞤢𞥄𞤪𞤼𞤮𞤤 𞤶𞤢𞤽𞤣𞤫 𞤢𞥄𞤣𞤫𞥅. [𞥙] 𞤁𞤮𞤺𞤮𞥅𞤩𞤫-𞤥𞤮𞥅𞤬𞤼𞤵𞤩𞤫 𞤸𞤢𞤲𞤣𞤫 𞤩𞤫𞥅 𞤨𞤵𞤯𞥆𞤭𞥅 𞤸𞤮𞤯𞤣𞤫 𞤫 𞤲'𞤣𞤫𞤪 𞤬𞤢𞤤𞤲'𞤣𞤫 𞤐𞤭𞥅𞤤 𞤳𞤮 𞤫 𞤴𞤮𞤲𞤼𞤢 𞤆𞤤𞤫𞤭𞤧𞤼𞤮𞤧𞤫𞤲 𞤸𞤢𞤳𞥆𞤵𞤲'𞤣𞤫𞥅𞤶𞤮⹁ 𞤳𞤮 𞤭𞤲𞤢 𞤱𞤮𞤲𞤢 𞤣𞤵𞥅𞤩𞤭 𞥑𞥒𞥐 𞥐𞥐𞥐 𞤶𞤮𞥅𞤲𞤭. 𞤉 𞤶𞤮𞥅𞤬𞤲𞤭𞤪𞤣𞤫 𞤶𞤢𞤥𞤢𞥄𞤲𞤵 𞤆𞤢𞤤𞤫𞤮𞤤𞤭𞤼𞤭𞤳⹁ 𞤱𞤫𞥅𞤴𞤮 𞤶𞤮𞥅𞤪𞤲'𞤺𞤮 𞤼𞤮 𞤊𞤵𞤯𞤲𞤢𞥄𞤲'𞤺𞤫 𞤀𞤬𞤪𞤭𞤳 𞤩𞤫𞤴𞤣𞤭𞥅𞤥𞤢 𞤩𞤵𞥅𞤩𞤣𞤫 𞤫 𞤴𞤮𞥅𞤪𞤣𞤫⹁ 𞤯𞤵𞤥 𞤢𞤣𞥆𞤢𞤲𞤭 𞤴𞤭𞤥𞤩𞤫 𞤣𞤭𞥅𞤱𞤢𞥄𞤲 𞤮𞥅 𞤩𞤫𞤴𞤣𞤢𞥄𞤣𞤫 𞤸𞤫𞥅𞤱𞤣𞤫 𞤳𞤮𞤴𞤫 𞤥𞤵𞤥 𞤫𞤲 𞤫 𞤧𞤢𞤪𞤢𞥄𞤶𞤭 𞤥𞤢𞥄𞤴𞤮 𞤲'𞤺𞤮𞥅.

𞤏𞤢𞤳𞥆𞤢𞤼𞤭 𞤳𞤮 𞤢𞤣𞤭𞥅 𞤤𞤢𞥄𞤥𞤵

𞤉 𞤶𞤢𞤥𞤢𞥄𞤲𞤵 𞤳𞤮 𞤢𞤣𞤭𞥅 𞤤𞤢𞥄𞤥𞤵𞥅𞤶𞤭 𞤫 𞤬𞤵𞤯𞥆𞤮𞥅𞤣𞤫 𞤤𞤢𞥄𞤥𞤵⹁ 𞤱𞤫𞥅𞤴𞤮 𞤃𞤭𞤧𞤪𞤢 𞤭𞤲𞤢 𞤬𞤢𞤥𞤯𞤭 𞤲𞤮 𞤬𞤫𞥅𞤱𞤭 𞤫 𞤸𞤢𞤲𞤣𞤫. 𞤐𞤮𞤳𞥆𞤵𞥅𞤶𞤭 𞤥𞤢𞤱𞤯𞤭 𞤫 𞤲'𞤣𞤫𞤪 𞤤𞤫𞤴𞤣𞤭 𞤉𞤶𞤭𞤨𞤼 𞤭𞤲𞤢 𞤲'𞤶𞤵𞤩𞥆𞤭𞤲𞤢𞥄 𞤫 𞤤𞤫𞤯𞥆𞤫⹁ 𞤭𞤲𞤢 𞤲'𞤶𞤭𞤤𞥆𞤮𞤲'𞤣𞤭𞤪𞤭 𞤫 𞤶𞤢𞤱𞤣𞤭 𞤲'𞤣𞤢𞤪𞤭𞥅𞤲'𞤣𞤭. 𞤂𞤫𞤯𞥆𞤫 𞤫 𞤣𞤢𞥄𞤦𞤢𞥄𞤶𞤭 𞤤𞤢𞤣𞥆𞤫 𞤩𞤵𞤪𞤭 𞤸𞤫𞥅𞤱𞤣𞤫 𞤫 𞤲𞤮𞤳𞥆𞤵𞥅𞤶𞤭 𞤼𞤢𞥄𞤪𞤭𞥅𞤯𞤭 𞤯𞤭𞥅 𞤬𞤮𞤬⹁ 𞤳𞤢𞤣𞤭 𞤣𞤭𞥅𞤱𞤢𞥄𞤲 𞤐𞤭𞥅𞤤 𞤭𞤲𞤢 𞤱𞤢𞤤𞥆𞤭𞤼𞤢 𞤷𞤮𞤤𞥆𞤭 𞤲'𞤣𞤭𞤴𞤢𞤥 𞤳𞤫𞥅𞤱𞤯𞤭. 𞤁𞤮𞤺𞥆𞤮𞤤 𞤭𞤲𞤢 𞤸𞤫𞥅𞤱𞤭 𞤫 𞤃𞤭𞤧𞤪𞤢𞤲𞤢𞥄𞤩𞤫⹁ 𞤳𞤢𞤣𞤭 𞤳𞤮 𞤫 𞤮𞥅𞤲 𞤧𞤢𞤸𞤢𞥄 𞤳𞤢𞤣𞤭 𞤣𞤢𞥄𞤦𞤢𞥄𞤶𞤭 𞤳𞤫𞥅𞤱𞤯𞤭 𞤨𞤵𞤯𞥆𞤭𞥅 𞤪𞤫𞤱𞤣𞤫. [𞥑𞥐]

𞤉 𞤸𞤭𞤼𞤢𞥄𞤲'𞤣𞤫 𞥕𞥕𞥐𞥐 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄⹁ 𞤤𞤫𞤰𞥆𞤭 𞤼𞤮𞤳𞤮𞥅𞤧𞤭 𞤶𞤮𞥅𞤯𞤭𞥅𞤯𞤭 𞤫 𞤲'𞤣𞤫𞤪 𞤬𞤢𞤤𞤲'𞤣𞤫 𞤐𞤭𞥅𞤤 𞤰𞤫𞤤𞥆𞤭𞤼𞤭𞥅𞤥𞤢 𞤫 𞤲'𞤣𞤫𞤪 𞤨𞤭𞤲𞤫 𞤳𞤫𞥅𞤱𞤯𞤫 𞤳𞤮𞤤𞥆𞤭𞤼𞤮𞥅𞤶𞤫 𞤶𞤮𞤺𞤢𞥄𞤣𞤫 𞤣𞤮𞥅𞤤𞤫 𞤫 𞤲'𞤣𞤫𞤥𞤢 𞤫 𞤣𞤢𞥄𞤦𞤢𞥄𞤶𞤭⹁ 𞤫 𞤢𞤲𞤣𞤭𞤲'𞤣𞤫 𞤯𞤵𞤥 𞤫𞤲 𞤫 𞤲'𞤦𞤢𞤴𞤣𞤭𞥅𞤶𞤭 𞤥𞤵𞤥 𞤫𞤲 𞤫 𞤺𞤫𞤯𞤫 𞤥𞤵𞤥 𞤫𞤲 ⹁ 𞤳𞤮 𞤱𞤢𞤴𞤭 𞤲𞤮 𞤷𞤮𞤥𞤷𞤭⹁ 𞤶𞤵𞥅𞤯𞤫 𞤫 𞤦𞤫𞤯𞤭. 𞤇𞤵𞤪𞤭 𞤥𞤢𞤱𞤲𞤵𞤣𞤫 𞤫 𞤯𞤫𞥅𞤲 𞤨𞤭𞤲𞤫 𞤺𞤢𞤣𞤢𞤲𞤫 𞤃𞤭𞤧𞤪𞤢 𞤚𞤮𞥅𞤱𞤲'𞤣𞤫 (𞤊𞤵𞤯𞤲𞤢𞥄𞤲'𞤺𞤫) 𞤳𞤮 𞤨𞤭𞤲𞤢𞤤 𞤄𞤢𞤣𞤢𞤪𞤭𞤴𞤢𞤲𞤳𞤫𞥅𞤱𞤢𞤤⹁ 𞤭𞤲𞤢 𞤺𞤢𞤧𞤢 𞤼𞤢𞤱𞤢 𞤵𞤥𞥆𞤮𞤪𞤭𞥅 𞤳𞤮 𞤫 𞤶𞤫𞥅𞤪𞤫𞥅𞤲'𞤣𞤫 𞤖𞤭𞤪𞤲𞤢𞥄𞤲'𞤺𞤫 ⁏ 𞤭𞤲𞤢 𞤢𞤲𞤣𞤭𞤪𞤢𞤲𞤮𞥅 𞤧𞤫𞤪𞤢𞥄𞤶𞤭 𞤼𞤮𞥅𞤱𞤯𞤭⹁ 𞤳𞤵𞥅𞤼𞤮𞤪𞤯𞤫 𞤳𞤢𞥄𞤰𞤫⹁ 𞤫 𞤳𞤵𞥅𞤼𞤮𞤪𞤢𞤺𞤮𞤤 𞤲'𞤶𞤢𞤥𞤲'𞤣𞤭.

𞤊𞤵𞤯𞥆𞤮𞥅𞤣𞤫 𞤤𞤢𞥄𞤥𞤵 (𞤸𞤫𞤣𞥆𞤫 𞥓𞥑𞥕𞥐-𞥒𞥖𞥘𞥖 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄)

𞤔𞤢𞤥𞤢𞤲𞤵𞥅𞤶𞤭 𞤤𞤢𞥄𞤥𞤵 𞤢𞤪𞤢𞤲𞤣𞤫𞥅𞤶𞤭 𞤭𞤲𞤢 𞤩𞤢𞤣𞤭𞥅 𞤫 𞤶𞤢𞤥𞤢𞥄𞤲𞤵 𞤅𞤵𞤥𞤫𞤪𞤭𞤢𞤲-𞤀𞤳𞥆𞤢𞤣𞤭𞤢𞤲 𞤫𞤲 𞤼𞤮 𞤃𞤫𞤧𞤮𞤨𞤮𞤼𞤢𞤥𞤭𞤢 𞤫 𞤉𞤤𞤢𞤥 𞤩𞤮𞥅𞤴𞤯𞤮. 𞤀𞤤𞤥𞤢𞥄𞤥𞤭 𞤃𞤭𞤧𞤪𞤢 𞤥𞤮 𞤼𞤫𞥅𞤥𞤭𞤲𞤢𞤲𞤣𞤫 𞥓𞤩𞤭𞥅𞤪𞤫 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄. 𞤃𞤢𞤲𞤫𞤼𞤸𞤮 𞤪𞤫𞤲𞤣𞤭𞤲𞤭 𞤤𞤢𞥄𞤥𞤩𞤫 𞤶𞤵𞥅𞤼𞤩𞤫 𞤺𞤭𞤤𞤢 𞤫 𞤃𞤫𞤲𞤫𞤧 𞤸𞤢𞥄 𞤫 𞤶𞤢𞤥𞤢𞥄𞤲𞤵 𞤥𞤵𞤥 𞤫 𞤲'𞤣𞤫𞤪 𞤤𞤢𞥄𞤥𞤵𞥅𞤶𞤭 𞥓𞥐⹁ 𞤳𞤮 𞤯𞤵𞤥 𞤱𞤮𞤲𞤭 𞤲'𞤶𞤵𞤩𞥆𞤵𞤣𞤭 𞤸𞤵𞥅𞤼𞤮𞤪𞤼𞤫𞥅𞤲'𞤣𞤫 𞤸𞤢𞥄 𞤸𞤢𞤲𞤣𞤫. 𞤐'𞤁𞤫 𞤬𞤵𞤯𞥆𞤮𞤪𞤭𞥅 𞤣𞤢𞥄𞤪𞤼𞤮𞤤 𞤥𞤢𞤴𞤪𞤫 𞤤𞤢𞥄𞤱𞤯𞤵𞤲'𞤣𞤫 𞤳𞤮 𞤫 𞤤𞤢𞥄𞤥𞤯𞤮 𞤦𞤭𞤴𞤫𞤼𞤫𞥅𞤯𞤮 "𞤃𞤫𞤲𞤭" (𞤱𞤢𞤤𞥆𞤢 𞤃𞤫𞤲𞤫𞤧 𞤫 𞤯𞤫𞤥𞤲'𞤺𞤢𞤤 𞤘𞤫𞤪𞤫𞤳)⹁ 𞤨𞤮𞤼𞤲𞤮𞥅𞤯𞤮 𞤸𞤢𞤱𞤪𞤵𞤣𞤫 𞤫 𞤤𞤢𞥄𞤥𞤵𞥅𞤶𞤭 𞤯𞤭𞤯𞤭 𞤃𞤭𞤧𞤪𞤢 𞤚𞤮𞥅𞤱𞤯𞤮 𞤫 𞤃𞤭𞤧𞤪𞤢 𞤂𞤫𞤧.

𞤂𞤢𞥄𞤥𞤵 𞤩𞤮𞥅𞤴𞤲'𞤺𞤵 (𞥒𞥖𞥘𞥖-𞥒𞥑𞥘𞥑 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄)

𞤆𞤭𞤪𞤢𞤥𞤭𞤣𞤵𞥅𞤶𞤭 𞤘𞤭𞥁𞤢 𞤭𞤲𞤢 𞤲'𞤶𞤫𞤴𞤢𞥄 𞤫 𞤥𞤢𞥄𞤲'𞤣𞤫𞥅𞤶𞤭 𞤩𞤵𞤪𞤯𞤭 𞤢𞤲𞤣𞤫𞥅𞤣𞤫 𞤫 𞤶𞤢𞤽𞤣𞤫 𞤃𞤭𞤧𞤪𞤢 𞤩𞤮𞥅𞤴𞤲'𞤣𞤫.

𞤒𞤢𞤸𞤪𞤵𞤺𞤮𞤤 𞤴𞤫𞥅𞤧𞤮 𞤥𞤢𞤱𞤲'𞤺𞤮𞤤 𞤫 𞤲'𞤣𞤫𞤪 𞤥𞤢𞤸𞤣𞤭⹁ 𞤻𞤫𞥅𞤻𞤢𞤤⹁ 𞤫 𞤳𞤢𞤪𞤢𞤤𞥆𞤢𞥄𞤺𞤢𞤤 𞤱𞤢𞤯𞤭𞥅 𞤫 𞤲'𞤣𞤫𞤪 𞤤𞤢𞥄𞤥𞤵 𞤩𞤮𞥅𞤴𞤲'𞤺𞤵⹁ 𞤯𞤵𞤥 𞤢𞤣𞥆𞤢𞤲𞤭 𞤯𞤵𞤥 𞤩𞤫𞤴𞤣𞤢𞥄𞤣𞤫 𞤸𞤫𞥅𞤱𞤣𞤫 𞤫 𞤲'𞤣𞤫𞤥𞤢 𞤫 𞤳𞤫𞥅𞤱𞤢𞤤 𞤴𞤭𞤥𞤩𞤫⹁ 𞤯𞤵𞤥 𞤲𞤮𞥅𞤲 𞤳𞤮 𞤲'𞤶𞤵𞤩𞥆𞤵𞤣𞤭 𞤤𞤢𞥄𞤥𞤵 𞤼𞤢𞤦𞤭𞤼𞤲'𞤣𞤭. [𞥒𞥗] 𞤒𞤮𞤺𞤢 𞤫 𞤺𞤮𞤤𞥆𞤫 𞤥𞤢𞤱𞤯𞤫 𞤯𞤫 𞤃𞤭𞤧𞤪𞤢 𞤩𞤮𞥅𞤴𞤯𞤮 𞤱𞤢𞤯𞤭⹁ 𞤸𞤮𞤲𞤮 𞤆𞤭𞤪𞤢𞤥𞤭𞤣 𞤘𞤭𞥁𞤢 𞤫 𞤅𞤬𞤭𞤲𞤳𞤧 𞤥𞤢𞤱𞤯𞤮⹁ 𞤥𞤢𞤸𞤢𞥄 𞤳𞤮 𞤫 𞤶𞤢𞤥𞤢𞥄𞤲𞤵 𞤂𞤢𞥄𞤥𞤵 𞤩𞤮𞥅𞤴𞤲'𞤺𞤵. 𞤉 𞤺𞤢𞤪𞤣𞤢𞤺𞤮𞤤 𞤱𞤭𞥁𞤭𞤫𞤪 𞤮𞥅⹁ 𞤢𞤪𞤣𞤭𞥅𞤩𞤫 𞤣𞤮𞤱𞤤𞤢 𞤩𞤫𞥅 𞤭𞤲𞤢 𞤥𞤮𞥅𞤬𞤼𞤢 𞤲'𞤶𞤮𞤩𞤣𞤭⹁ 𞤭𞤲𞤢 𞤲'𞤶𞤵𞤩𞥆𞤭𞤲𞤢 𞤫𞤩𞥆𞤢𞥄𞤯𞤫 𞤲'𞤣𞤭𞤴𞤢𞤥 𞤲'𞤺𞤢𞤥 𞤥𞤮𞤰𞥆𞤭𞤲'𞤣𞤫 𞤲'𞤺𞤢𞤤𞤵⹁ 𞤭𞤲𞤢 𞤲'𞤦𞤭𞤲𞤣𞤢 𞤪𞤫𞤥𞤮𞥅𞤩𞤫 𞤲'𞤺𞤢𞤥 𞤺𞤮𞤤𞥆𞤮𞤪𞤢𞥄𞤣𞤫 𞤫𞤩𞥆𞤢𞥄𞤯𞤫 𞤥𞤢𞤸𞤲'𞤺𞤮⹁ 𞤭𞤲𞤢 𞤲'𞤦𞤢𞤯𞤢 𞤲'𞤶𞤵𞤩𞥆𞤵𞤣𞤭 𞤻𞤢𞥄𞤱𞤮𞥅𞤪𞤫 𞤲'𞤺𞤢𞤥 𞤼𞤢𞤦𞤭𞤼𞤭𞤲'𞤣𞤫 𞤶𞤢𞤥 𞤫 𞤳𞤭𞤧𞤢𞤤.

𞤁𞤵𞥅𞤩𞤭 𞤸𞤢𞤳𞥆𞤵𞤲'𞤣𞤫𞥅𞤶𞤭 𞤺𞤢𞤣𞤢𞤲𞤭 (𞥒𞥑𞥘𞥑–𞥒𞥐𞥕𞥕 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄)

𞤕𞤢𞤺𞥆𞤢𞤤 𞤲'𞤣𞤫 𞤤𞤢𞥄𞤥𞤵 𞤸𞤢𞤳𞥆𞤵𞤲'𞤣𞤫𞥅𞤶𞤮 𞤉𞤶𞤭𞤨𞤼 𞤴𞤢𞤲𞤭 𞤫 𞤣𞤢𞤪𞤮𞤪𞤯𞤫 𞤂𞤢𞥄𞤥𞤢𞥄𞤲'𞤣𞤭 𞤩𞤮𞥅𞤴𞤲'𞤣𞤭 𞤲'𞤣𞤭𞥅⹁ 𞤲'𞤶𞤵𞤩𞥆𞤵𞤣𞤭 𞤲'𞤣𞤭𞥅 𞤲𞤢𞤼𞥆𞤭𞥅 𞤱𞤢𞥄𞤱𞤣𞤫 𞤱𞤢𞤤𞥆𞤭𞤼𞤣𞤫 𞤱𞤢𞤤𞥆𞤢 𞤣𞤫𞥅𞤰𞤲𞤵𞤣𞤫 𞤬𞤢𞤺𞥆𞤵𞤣𞤵 𞤤𞤫𞤴𞤣𞤭 𞤲'𞤣𞤭𞥅. 𞤘𞤵𞤱𞤫𞤪𞤲𞤫𞥅𞤪𞤵𞥅𞤶𞤭 𞤣𞤭𞥅𞤱𞤢𞤲𞤵𞥅𞤶𞤭 𞤯𞤭𞥅 𞤲'𞤦𞤢𞥄𞤱𞤢𞥄𞤲𞤮 𞤸𞤭𞥅𞤧𞤢𞥄𞤣𞤫 𞤤𞤢𞥄𞤥𞤯𞤮 𞤮𞥅 𞤲'𞤺𞤢𞤥 𞤱𞤢𞤤𞥆𞤭𞤼𞤣𞤫 𞤯𞤵𞤥 𞤫𞤲 𞤫 𞤧𞤢𞤸𞤢𞥄𞤶𞤭 𞤷𞤢𞤯𞤫𞥅𞤤𞤫⹁ 𞤽𞤢𞤳𞥆𞤫𞥅𞤲'𞤣𞤫 𞤲'𞤺𞤵𞥅𞤪𞤢 𞤫 𞤤𞤵𞥅𞤪𞤢𞤤 𞤨𞤮𞤤𞤭𞤼𞤭𞤳 𞤶𞤮𞤱𞤭𞤼𞤭𞥅𞤲'𞤺𞤢𞤤 𞤫 𞤸𞤫𞥅𞤺𞤫 𞤫 𞤸𞤢𞤪𞤫𞥅𞤶𞤭 𞤲'𞤣𞤫𞤪 𞤤𞤫𞤴𞤣𞤭 𞤼𞤮𞤳𞤮𞥅𞤧𞤭. 𞤑𞤮𞤲𞤮 𞤳𞤢𞤥 𞤫 𞤷𞤢𞤯𞤫𞥅𞤤𞤫 𞤷𞤢𞤯𞤼𞤵𞤯𞤫⹁ 𞤤𞤢𞥄𞤥𞤩𞤫 𞤲𞤮𞤳𞥆𞤵𞥅𞤶𞤭 𞤯𞤭𞥅⹁ 𞤩𞤫 𞤲'𞤺𞤢𞤤𞤢𞥄 𞤲'𞤶𞤮𞤩𞤣𞤭 𞤤𞤢𞥄𞤥𞤯𞤮 𞤮𞥅⹁ 𞤳𞤵𞥅𞤼𞤮𞤪𞤭𞥅𞤥𞤢 𞤶𞤫𞤴𞤼𞤢𞥄𞤪𞤫 𞤥𞤵𞤥 𞤫𞤲 𞤸𞤫𞤧𞤫𞤪𞤫 𞤲'𞤺𞤢𞤥 𞤼𞤢𞤦𞤭𞤼𞤭𞤲'𞤣𞤫 𞤨𞤭𞤲𞤢𞤤 𞤰𞤫𞤤𞥆𞤭𞤼𞤮𞥅𞤱𞤢𞤤 𞤫 𞤲'𞤣𞤫𞤪 𞤣𞤭𞥅𞤱𞤢𞤲𞤵𞥅𞤶𞤭 𞤯𞤭𞥅. 𞤐'𞤁𞤫 𞤩𞤫 𞤲'𞤺𞤮𞤲𞤭 𞤫 𞤶𞤮𞤺𞤢𞥄𞤣𞤫 𞤶𞤢𞤱𞤣𞤭 𞤥𞤢𞤩𞥆𞤫⹁ 𞤣𞤭𞥅𞤱𞤢𞤲𞤵𞥅𞤶𞤭 𞤯𞤭𞥅 𞤩𞤫𞤴𞤣𞤭𞥅 𞤢𞤤𞤯𞤵𞤣𞤫 𞤫 𞤬𞤢𞤺𞥆𞤵𞤣𞤵⹁ 𞤯𞤵𞤥 𞤬𞤭𞤪𞤼𞤭 𞤳𞤮 𞤱𞤭𞤪𞤱𞤭𞤪𞤲'𞤣𞤫 𞤩𞤵𞤪𞤲'𞤣𞤫 𞤥𞤢𞤱𞤲𞤵𞤣𞤫 𞤫 𞤥𞤮𞤰𞥆𞤵𞤣𞤫 𞤫 𞤲'𞤣𞤫𞤪 𞤣𞤫𞤲𞤣𞤢𞥄𞤲'𞤺𞤢𞤤 𞤬𞤢𞤲𞥆𞤵𞥅𞤶𞤭 𞤪𞤫𞤲𞤣𞤮. [𞥓𞥒] 𞤉 𞤲'𞤣𞤫𞤪 𞤦𞤵𞤪𞤧𞤭𞥅𞤶𞤭 𞤨𞤫𞥅𞤻𞤷𞤵⹁ 𞤢𞤪𞤼𞤭𞤧𞤢𞤲𞤫𞥅𞤩𞤫 𞤣𞤭𞥅𞤱𞤢𞥄𞤲 𞤮𞥅 𞤰𞤫𞤼𞥆𞤭𞥅 𞤫 𞤸𞤵𞥅𞤼𞤮𞤪𞤢𞥄𞤣𞤫 𞤥𞤮𞤼𞤭𞤬𞤵𞥅𞤶𞤭 𞤨𞤭𞤲𞤢𞤤 𞤯𞤭 𞤥𞤫𞥅𞤯𞤢𞥄 𞤪𞤫𞥅𞤪𞤲𞤫𞥅𞤣𞤫 𞤲'𞤺𞤢𞤥 𞤤𞤢𞥄𞤥𞤤𞤢𞥄𞤥𞤵 𞤩𞤮𞥅𞤴𞤯𞤮⹁ 𞤫 𞤦𞤭𞤲𞤣𞤭𞤼𞤢𞤺𞤮𞤤 𞤰𞤫𞤤𞥆𞤭𞤼𞤭𞥅 𞤧𞤷𞤤𞤫𞤧 𞤦𞤭𞤲𞤣𞤮𞤤 𞤳𞤮𞤤𞥆𞤭𞤼𞤮𞥅𞤶𞤭 𞤱𞤫𞤤𞤼𞤢𞥄𞤪𞤫 𞤫 𞤢𞤧𞤤𞤭 𞤶𞤢𞤥𞤢𞥄𞤲𞤵 𞤲'𞤺𞤵𞥅.

𞤂𞤢𞥄𞤥𞤵 𞤸𞤢𞤳𞥆𞤵𞤲'𞤣𞤫𞥅𞤶𞤮 (𞥒𞥑𞥓𞥔-𞥑𞥖𞥙𞥐 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄)

𞤂𞤢𞥄𞤥𞤩𞤫 𞤂𞤢𞥄𞤥𞤵 𞤸𞤢𞤳𞥆𞤵𞤲'𞤣𞤫𞥅𞤶𞤮 𞤲'𞤺𞤢𞤪𞤼𞤭𞤪𞤭 𞤣𞤫𞥅𞤰𞤪𞤫 𞤫 𞤰𞤫𞤤𞥆𞤭𞤼𞤢𞥄𞤪𞤫 𞤤𞤫𞤴𞤣𞤭 𞤲'𞤣𞤭𞥅⹁ 𞤯𞤵𞤥 𞤢𞤣𞥆𞤢𞤲𞤭 𞤤𞤫𞤴𞤣𞤭 𞤲'𞤣𞤭 𞤵𞤥𞥆𞤭𞤲'𞤣𞤫 𞤲𞤢𞥄𞤤𞤢𞤲𞤳𞤢𞥄𞤺𞤢𞤤⹁ 𞤦𞤭𞤲𞤣𞤮𞤤⹁ 𞤫 𞤫𞤩𞥆𞤮𞥅𞤶𞤭 𞤥𞤢𞤸𞤣𞤭 𞤥𞤢𞤱𞤯𞤭. [𞥓𞥗] 𞤃𞤫𞤲𞤼𞤵𞤸𞤮𞤼𞤫𞤨 𞤋𞥅 𞤫 𞤤𞤮𞤥𞤼𞤭𞥅𞤩𞤫 𞤥𞤵𞤥 𞤫 𞤲'𞤣𞤫𞤪 𞤤𞤢𞥄𞤥𞤵 𞥑𞥑𞤩𞤮 𞤤𞤢𞥄𞤥𞤭𞥅𞤥𞤢 𞤺𞤭𞤤𞤢 𞤚𞤫𞤦𞤫𞤧⹁ 𞤳𞤮𞤲𞤮 𞤾𞤭𞥁𞤭𞤫𞤪 𞤀𞤥𞤫𞤲𞤫𞤥𞤸𞤢𞤼 𞤋⹁ 𞤰𞤫𞤼𞥆𞤵𞤯𞤮 𞤤𞤢𞥄𞤥𞤵 𞤫 𞤬𞤵𞤯𞥆𞤮𞥅𞤣𞤫 𞤤𞤢𞥄𞤥𞤵 𞥑𞥒𞤩𞤮 𞤸𞤫𞤣𞥆𞤫 𞤸𞤭𞤼𞤢𞥄𞤲'𞤣𞤫 𞥑𞥙𞥘𞥕 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄⹁ 𞤤𞤢𞥄𞤥𞤭𞥅𞤥𞤢 𞤺𞤭𞤤𞤢 𞤚𞤫𞤦𞤫𞤧. 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄⹁ 𞤫𞤺𞥆𞤭𞤲𞤭 𞤤𞤢𞥄𞤥𞤮𞤪𞤺𞤮 𞤤𞤢𞥄𞤥𞤵 𞤲'𞤺𞤵𞥅 𞤫 𞤱𞤵𞤪𞤮 𞤱𞤭𞤴𞤫𞤼𞤫𞥅𞤲'𞤺𞤮 𞤋𞤼𞤶𞤼𞤢𞤱𞤴⹁ 𞤼𞤢𞤱𞤢𞥄𞤲'𞤺𞤮 𞤼𞤮 𞤊𞤢𞤴𞤮𞤵𞤥. [𞥓𞥘] 𞤘𞤭𞤤𞤢 𞤋𞤼𞤶𞤼𞤢𞤱𞤴⹁ 𞤤𞤢𞥄𞤥𞤩𞤫 𞤤𞤢𞥄𞤥𞤵 𞥑𞥒𞤩𞤮 𞤰𞤫𞤼𞥆𞤭𞥅 𞤫𞤩𞥆𞤢𞥄𞤲'𞤣𞤫 𞤱𞤮𞤯𞤲'𞤣𞤫 𞤲'𞤺𞤢𞤥 𞤰𞤫𞤤𞥆𞤭𞤼𞤣𞤫 𞤤𞤫𞤴𞤣𞤭 𞤫 𞤲'𞤣𞤭𞤴𞤢𞤥 𞤲'𞤺𞤢𞤥 𞤩𞤫𞤴𞤣𞤵𞤣𞤫 𞤲'𞤣𞤫𞤥𞤢 𞤫 𞤲'𞤣𞤫𞤪 𞤣𞤭𞥅𞤱𞤢𞥄𞤲 𞤸𞤫𞥅.

𞤂𞤢𞥄𞤥𞤵 𞤫 𞤬𞤢𞤺𞥆𞤵𞤣𞤵

𞤐'𞤔𞤵𞤩𞥆𞤵𞤣𞤭 𞤫 𞤲'𞤶𞤵𞤤𞤢𞥄𞤺𞤵

𞤊𞤭𞤪𞤢𞤱𞤲𞤢 𞤳𞤮 𞤤𞤢𞥄𞤥𞤯𞤮 𞤤𞤫𞤴𞤣𞤭 𞤲'𞤣𞤭𞥅 𞤼𞤭𞤥𞥆𞤵𞤯𞤮⹁ 𞤳𞤮 𞤬𞤢𞤥𞤯𞤭 𞤬𞤮𞤬 𞤫 𞤥𞤭𞥅𞤶𞤮 𞤥𞤵𞤥⹁ 𞤭𞤲𞤢 𞤶𞤮𞤺𞤭𞤲𞤮𞥅 𞤣𞤮𞥅𞤤𞤫 𞤼𞤭𞤥𞥆𞤵𞤯𞤫 𞤫 𞤣𞤮𞤱 𞤤𞤫𞤴𞤣𞤭 𞤲'𞤣𞤭𞥅 𞤫 𞤶𞤢𞤱𞤣𞤭 𞤥𞤵𞤥. 𞤂𞤢𞥄𞤥𞤯𞤮 𞤮𞥅 𞤳𞤮 𞤺𞤢𞤪𞤣𞤭𞥅𞤯𞤮 𞤳𞤮𞤲𞤵 𞤩𞤵𞤪𞤯𞤮 𞤼𞤮𞥅𞤱𞤣𞤫 𞤫 𞤸𞤮𞥅𞤪𞤫𞥅𞤶𞤮 𞤤𞤢𞥄𞤥𞤵⹁ 𞤼𞤵𞥅𞤺𞤭𞥅𞤯𞤮 𞤫 𞤦𞤭𞤪𞤮𞥅𞤶𞤭 𞤺𞤮𞤤𞥆𞤮𞤼𞤮𞥅𞤩𞤫 𞤫 𞤤𞤢𞥄𞤥𞤵 𞤲'𞤺𞤢𞤥 𞤴𞤵𞤩𞥆𞤭𞤲'𞤣𞤫 𞤺𞤫𞤯𞤫 𞤥𞤵𞤥. 𞤍𞤭𞤯𞤢𞤩𞤮 𞤥𞤢𞤳𞥆𞤮⹁ 𞤸𞤮𞤲𞤮 𞤱𞤭𞥁𞤭𞤫𞤪⹁ 𞤭𞤲𞤢 𞤸𞤢𞤤𞤬𞤭𞤲𞤢𞥄 𞤲'𞤶𞤵𞤩𞥆𞤵𞤣𞤭⹁ 𞤳𞤮 𞤳𞤢𞤲𞤳𞤮 𞤱𞤮𞤲𞤭 𞤱𞤢𞤳𞤭𞤤𞤭𞥅𞤶𞤮 𞤤𞤢𞥄𞤥𞤯𞤮 𞤮𞥅⹁ 𞤮𞤥𞤮 𞤴𞤵𞤩𞥆𞤭𞤲𞤢 𞤱𞤭𞤯𞤼𞤮𞥅𞤶𞤭 𞤤𞤫𞤴𞤣𞤭⹁ 𞤳𞤢𞥄𞤤𞤭𞤧⹁ 𞤫𞤩𞥆𞤢𞥄𞤯𞤫 𞤥𞤢𞤸𞤣𞤭⹁ 𞤲'𞤶𞤵𞤩𞥆𞤵𞤣𞤭 𞤧𞤢𞤪𞤭𞤴𞤢 𞤫 𞤣𞤫𞤬𞤼𞤫 𞤦𞤭𞤲𞤣𞤢𞥄𞤯𞤫. [𞥗𞥔] 𞤚𞤮 𞤦𞤢𞤲𞤺𞤫 𞤣𞤭𞥅𞤱𞤢𞥄𞤲⹁ 𞤤𞤫𞤴𞤣𞤭 𞤲'𞤣𞤭𞥅 𞤬𞤫𞤷𞥆𞤭𞥅 𞤳𞤮 𞤫 𞤣𞤭𞥅𞤱𞤢𞤲𞤵𞥅𞤶𞤭 𞥔𞥒 𞤲'𞤶𞤵𞤩𞥆𞤵𞤣𞤭 𞤤𞤢𞥄𞤥𞤵 𞤭𞤲𞤢 𞤱𞤭𞤴𞤫𞥅 𞤲𞤮𞤥𞤫𞤧⹁ 𞤸𞤫𞥅𞤲 𞤺𞤮𞥅𞤼𞤮 𞤬𞤮𞤬 𞤭𞤲𞤢 𞤤𞤢𞥄𞤥𞤭𞥅 𞤲𞤮𞤥𞤢𞤪𞤷𞤸⹁ 𞤥𞤮 𞤱𞤮𞤲𞤭 𞤳𞤢𞤤𞤢 𞤭𞤲𞤢 𞤶𞤮𞤺𞤭𞥅 𞤾𞤭𞥁𞤭𞤫𞤪 𞤥𞤮 𞤮 𞤱𞤮𞤲𞤭 𞤫 𞤣𞤮𞤱 𞤥𞤵𞤥. 𞤚𞤫𞤥𞤨𞤤𞤫𞤧 𞤱𞤮𞤲𞤭 𞤩𞤢𞤲𞤣𞤵 𞤬𞤢𞤺𞥆𞤵𞤣𞤵. 𞤏𞤮𞤲𞤢𞥄 𞤼𞤢𞤲 𞤲𞤮𞤳𞥆𞤵𞥅𞤶𞤭 𞤣𞤫𞤱𞤢𞤤⹁ 𞤳𞤮𞤲𞤮 𞤳𞤢𞤣𞤭 𞤳𞤮 𞤯𞤭𞥅𞤲 𞤲'𞤺𞤮𞤲𞤭 𞤲𞤮𞤳𞥆𞤵𞥅𞤶𞤭 𞤥𞤮𞥅𞤬𞤼𞤵𞤣𞤫 𞤫 𞤥𞤮𞥅𞤬𞤼𞤵𞤣𞤫 𞤶𞤢𞤱𞤣𞤭 𞤤𞤢𞥄𞤥𞤵 𞤲'𞤺𞤵𞥅 𞤫 𞤲'𞤣𞤫𞤪 𞤲'𞤶𞤵𞤩𞥆𞤵𞤣𞤭 𞤲'𞤶𞤵𞤤𞤢𞥄𞤺𞤵 𞤫 𞤳𞤢𞤩𞤭𞤪𞤯𞤫 𞤯𞤫 𞤰𞤫𞥅𞤱𞤮𞥅𞤩𞤫 𞤲'𞤶𞤵𞤩𞥆𞤭𞤲𞤼𞤢⹁ 𞤩𞤫 𞤲'𞤣𞤢𞤪𞤼𞤭𞤲𞤢 𞤺𞤢𞤱𞤪𞤭 𞤫 𞤶𞤢𞤱𞤣𞤭.

𞤁𞤢𞤪𞤲'𞤣𞤫 𞤪𞤫𞤲𞤣𞤮

𞤈𞤫𞤲𞤣𞤮 𞤉𞤶𞤭𞤨𞤼 𞤭𞤲𞤢 𞤸𞤫𞥅𞤱𞤭 𞤲'𞤦𞤢𞤴𞤣𞤭𞥅𞤶𞤭⹁ 𞤣𞤢𞤪𞤲'𞤣𞤫 𞤪𞤫𞤲𞤣𞤮 𞤭𞤲𞤢 𞤸𞤮𞤤𞥆𞤭𞤪𞤢 𞤲𞤮 𞤬𞤫𞥅𞤱𞤭. 𞤈𞤫𞤥𞤮𞥅𞤩𞤫 𞤳𞤮 𞤩𞤵𞤪𞤭 𞤸𞤫𞥅𞤱𞤣𞤫 𞤫 𞤴𞤭𞤥𞤩𞤫 𞤤𞤫𞤴𞤣𞤭 𞤲'𞤣𞤭𞥅⹁ 𞤳𞤮𞤲𞤮 𞤺𞤫𞤯𞤫 𞤲'𞤣𞤫𞤥𞤢 𞤯𞤫𞥅 𞤳𞤮 𞤤𞤢𞥄𞤥𞤵⹁ 𞤼𞤫𞤥𞤨𞤤𞤫⹁ 𞤱𞤢𞤤𞥆𞤢 𞤩𞤫𞤧𞤲'𞤺𞤵 𞤥𞤢𞤱𞤲'𞤺𞤵 𞤶𞤫𞤴𞤭 𞤤𞤫𞤴𞤣𞤭 𞤲'𞤣𞤭𞥅. [𞥘𞥐] 𞤈𞤫𞤥𞤮𞥅𞤩𞤫 𞤳𞤢𞤣𞤭 𞤭𞤲𞤢 𞤲'𞤶𞤮𞤺𞤭𞥅 𞤲'𞤶𞤮𞤩𞤣𞤭 𞤺𞤮𞤤𞥆𞤫⹁ 𞤭𞤲𞤢 𞤨𞤮𞤼𞤭 𞤺𞤮𞤤𞥆𞤮𞤪𞤢𞥄𞤣𞤫 𞤫𞤩𞥆𞤢𞥄𞤯𞤫 𞤲'𞤣𞤭𞤴𞤢𞤥 𞤱𞤢𞤤𞥆𞤢 𞤥𞤢𞤸𞤲'𞤺𞤮 𞤫 𞤲'𞤣𞤫𞤪 𞤲'𞤶𞤵𞤩𞥆𞤵𞤣𞤭 𞤷𞤮𞤪𞤾𞤫𞥅. [𞥘𞥑] 𞤐𞤢𞥄𞤤𞤢𞤲𞤳𞤮𞥅𞤩𞤫 𞤫 𞤢𞤪𞤼𞤭𞤧𞤢𞤲𞤫𞥅𞤩𞤫 𞤭𞤲𞤢 𞤲'𞤶𞤮𞤺𞤭𞤲𞤮𞥅 𞤣𞤢𞤪𞤲'𞤣𞤫 𞤩𞤵𞤪𞤲'𞤣𞤫 𞤼𞤮𞥅𞤱𞤣𞤫 𞤫 𞤪𞤫𞤥𞤮𞥅𞤩𞤫⹁ 𞤳𞤮𞤲𞤮 𞤳𞤢𞤣𞤭 𞤩𞤫 𞤲'𞤺𞤮𞤲𞤭 𞤳𞤮 𞤫 𞤤𞤫𞤧 𞤲'𞤶𞤭𞥅𞤥𞤢𞥄𞤲'𞤣𞤭 𞤤𞤢𞥄𞤥𞤵⹁ 𞤩𞤫 𞤲'𞤺𞤮𞤲𞤭 𞤳𞤮 𞤫 𞤺𞤮𞤤𞥆𞤮𞤪𞤢𞥄𞤣𞤫 𞤫 𞤲'𞤣𞤫𞤪 𞤣𞤵𞤯𞤫 𞤶𞤮𞤳𞥆𞤮𞤲'𞤣𞤭𞤪𞤯𞤫 𞤫 𞤼𞤫𞤥𞤨𞤤𞤫𞥅𞤶𞤭⹁ 𞤩𞤫 𞤲'𞤶𞤮𞤩𞤢𞤼𞤢 𞤳𞤮 𞤼𞤮 𞤦𞤢𞤲𞤺𞤫 𞤳𞤢𞥄𞤤𞤭𞤧 𞤤𞤢𞥄𞤥𞤵. 𞤄𞤭𞤲𞤣𞤮𞥅𞤩𞤫 𞤫 𞤢𞤪𞤣𞤭𞥅𞤩𞤫 𞤲'𞤦𞤢𞤯𞤭𞥅 𞤬𞤫𞤣𞥆𞤫 𞤼𞤮𞥅𞤱𞤲'𞤣𞤫 𞤉𞤶𞤭𞤨𞤼 𞤩𞤮𞥅𞤴𞤲'𞤣𞤫⹁ 𞤢𞤲𞤣𞤭𞤪𞤢𞥄𞤲'𞤣𞤫 « 𞤬𞤫𞤣𞥆𞤫 𞤳𞤭𞤤𞤼 𞤣𞤢𞤲𞤫𞥅𞤪𞤫 » 𞤫 𞤼𞤵𞥅𞤻𞤢𞥄𞤣𞤫 𞤫 𞤷𞤮𞤥𞤷𞤭 𞤣𞤢𞤲𞤫𞥅𞤶𞤭 𞤯𞤭 𞤲'𞤦𞤢𞤯𞤲𞤮𞥅 𞤳𞤮 𞤥𞤢𞥄𞤲'𞤣𞤫 𞤣𞤢𞤪𞤲'𞤣𞤫 𞤥𞤢𞤩𞥆𞤫. [𞥘𞥒] 𞤚𞤮𞥅𞤱𞤩𞤫 𞤭𞤲𞤢 𞤳𞤮𞤤𞥆𞤭𞤼𞤢 𞤲𞤮 𞤬𞤫𞥅𞤱𞤭 𞤣𞤢𞤪𞤲'𞤣𞤫 𞤥𞤵𞤥 𞤫𞤲 𞤪𞤫𞤲𞤣𞤮 𞤫 𞤲'𞤣𞤫𞤪 𞤲𞤢𞥄𞤤𞤢𞤲𞤳𞤢𞥄𞤺𞤢𞤤 𞤫 𞤦𞤭𞤲𞤣𞤮𞤤. 𞤂𞤫𞤧 𞤥𞤢𞤱𞤩𞤫 𞤩𞤫𞥅⹁ 𞤳𞤮 𞤢𞤤𞤥𞤵𞤩𞥆𞤫⹁ 𞤧𞤢𞤬𞤪𞤮𞥅𞤩𞤫⹁ 𞤫 𞤭𞤲𞤶𞤭𞤲𞤭𞤴𞤢𞤲𞤳𞤮𞥅𞤩𞤫 𞤶𞤮𞤺𞤭𞥅𞤩𞤫 𞤸𞤵𞤥𞤨𞤭𞤼𞤮 𞤳𞤫𞥅𞤪𞤭𞥅𞤯𞤮 𞤫 𞤬𞤢𞤲𞥆𞤵 𞤥𞤵𞤥 𞤫𞤲. 𞤂𞤢𞥄𞤩𞤼𞤢𞥄𞤲𞤭 𞤧𞤮 𞤼𞤢𞤱𞤭𞥅 𞤥𞤢𞤷𞥆𞤵𞤲'𞤺𞤢𞥄𞤺𞤵 𞤲𞤮 𞤨𞤢𞥄𞤥𞤭𞤪𞤼𞤫𞥅 𞤸𞤢𞤲𞤣𞤫 𞤲𞤭𞥅 𞤭𞤲𞤢 𞤱𞤮𞥅𞤣𞤭 𞤫 𞤃𞤭𞤧𞤪𞤢 𞤩𞤮𞥅𞤴𞤯𞤮 ⁏ 𞤭𞤲𞤢 𞤱𞤮𞥅𞤣𞤭 𞤤𞤵𞥅𞤪𞤢𞤤 𞤥𞤭𞥅𞤶𞤮 𞤸𞤢𞤳𞥆𞤵𞤲'𞤣𞤫 𞤱𞤭𞤲𞤣𞤮𞥅𞤩𞤫 𞤩𞤫𞥅.

𞤣𞤫𞤥𞤢𞤤

𞤐𞤢𞤬𞤮𞥅𞤪𞤫 𞤬𞤭𞤲𞤢𞥄-𞤼𞤢𞤱𞤢𞥄 𞤃𞤭𞤧𞤪𞤢 𞤩𞤮𞥅𞤴𞤯𞤮 𞤭𞤲𞤢 𞤱𞤢𞥄𞤱𞤭 𞤬𞤢𞥄𞤥𞤲𞤭𞤲𞤫𞥅𞤣𞤫 𞤫 𞤺𞤫𞤯𞤫 𞤺𞤫𞤯𞤫 𞤳𞤫𞥅𞤱𞤯𞤫 𞤥𞤮𞤰𞥆𞤫⹁ 𞤩𞤵𞤪𞤯𞤫 𞤼𞤫𞥅𞤽𞤼𞤵𞤣𞤫 𞤸𞤫𞥅𞤲 𞤳𞤮 𞤤𞤫𞤴𞤣𞤭 𞤲'𞤣𞤭 𞤢𞤤𞤢𞥄 𞤳𞤮 𞤱𞤮𞤲𞤭 𞤫 𞤥𞤵𞤥 𞤧𞤮 𞤱𞤮𞤲𞤢𞥄 𞤭𞤤𞤢𞤥 𞤐𞤭𞥅𞤤 𞤸𞤭𞤼𞤢𞥄𞤲'𞤣𞤫 𞤳𞤢𞤤𞤢. 𞤉𞤶𞤭𞤨𞤼𞤲𞤢𞥄𞤩𞤫 𞤩𞤮𞥅𞤴𞤩𞤫 𞤲'𞤦𞤢𞥄𞤱𞤭𞥅 𞤲𞤮𞥅𞤲 𞤣𞤢𞤻𞤣𞤫 𞤲'𞤺𞤵𞥅𞤪𞤢 𞤳𞤫𞥅𞤱𞤳𞤢⹁ 𞤳𞤮 𞤯𞤵𞤥 𞤢𞤣𞥆𞤢𞤲𞤭 𞤴𞤭𞤥𞤩𞤫 𞤩𞤫𞥅 𞤱𞤢𞥄𞤱𞤣𞤫 𞤸𞤵𞥅𞤼𞤮𞤪𞤢𞥄𞤣𞤫 𞤱𞤢𞤳𞤼𞤵𞥅𞤶𞤭 𞤫 𞤳𞤢𞤩𞤭𞤪𞤯𞤫 𞤲'𞤺𞤢𞤥 𞤱𞤢𞤯𞤣𞤫 𞤺𞤮𞤤𞥆𞤫 𞤨𞤭𞤲𞤢𞤤⹁ 𞤳𞤢𞤪𞤢𞤤𞥆𞤢𞥄𞤺𞤢𞤤 𞤫 𞤲𞤢𞥄𞤤𞤢𞤲𞤳𞤢𞥄𞤺𞤢𞤤. 𞤐'𞤔𞤵𞤩𞥆𞤵𞤣𞤭 𞤤𞤫𞤴𞤣𞤭 𞤭𞤲𞤢 𞤼𞤫𞤧𞤳𞤢𞤲𞤮𞥅 𞤫 𞤲'𞤣𞤫𞤪 𞤤𞤫𞤴𞤣𞤭 𞤉𞤶𞤭𞤨𞤼 𞤩𞤮𞥅𞤴𞤲'𞤣𞤭⹁ 𞤧𞤭𞤦𞤵 𞤲'𞤶𞤮𞤩𞤣𞤭 𞤲'𞤣𞤭𞥅 𞤭𞤲𞤢 𞤸𞤭𞥅𞤧𞤫𞥅 𞤫 𞤬𞤢𞤱𞤢𞥄𞤣𞤫 𞤫 𞤳𞤫𞥅𞤱𞤢𞤤 𞤤𞤫𞤴𞤣𞤭 𞤲'𞤣𞤭 𞤲𞤫𞤯𞥆𞤮 𞤶𞤮𞤺𞤭𞥅.

𞤲𞤺𞤢𞤴𞤲𞤢𞥄𞤳𞤵

𞤃𞤭𞤧𞤪𞤢𞤲𞤢𞥄𞤩𞤫 𞤭𞤲𞤢 𞤷𞤭𞤳𞥆𞤢𞤼𞤲𞤮𞥅 𞤱𞤮𞤲'𞤣𞤫 𞤶𞤮𞤳𞥆𞤮𞤲'𞤣𞤭𞤪𞤢𞤤 𞤥𞤮𞤰𞥆𞤢𞤤 𞤸𞤢𞤳𞥆𞤵𞤲'𞤣𞤫 𞤢𞥄𞤣𞤫𞥅 𞤫 𞤣𞤢𞥄𞤦𞤢𞥄𞤶𞤭 𞤳𞤮 𞤸𞤵𞥅𞤲'𞤣𞤫 𞤸𞤭𞤥𞥆𞤵𞤲'𞤣𞤫 𞤫 𞤲'𞤣𞤫𞤪 𞤲'𞤶𞤵𞤩𞥆𞤵𞤣𞤭 𞤼𞤢𞤺𞤮𞤬𞤫𞥅𞤪𞤫 ⁏ 𞤳𞤮 𞤲𞤮𞥅𞤲 𞤲𞤫 𞤳𞤢𞤣𞤭⹁ 𞤢𞥄𞤣𞤫𞥅 𞤫 𞤣𞤢𞥄𞤦𞤢𞥄𞤶𞤭 𞤫 𞤤𞤫𞤯𞥆𞤫 𞤲'𞤶𞤭𞤴𞤼𞤭𞤪𞤢𞥄 𞤳𞤮 𞤼𞤫𞤪𞤯𞤫 𞤣𞤫𞤲𞤼𞤢𞤤 𞤺𞤮𞥅𞤼𞤢𞤤. [𞥙𞥓] 𞤁𞤢𞥄𞤦𞤢𞥄𞤶𞤭⹁ 𞤺𞤢𞤤𞥆𞤫𞥅𞤶𞤭 𞤫 𞤤𞤢𞤣𞥆𞤫𞥅𞤶𞤭 𞤬𞤮𞤬⹁ 𞤳𞤮 𞤷𞤬𞤵𞥅𞤥 𞤱𞤢𞤷𞤬𞤭 𞤳𞤮 𞤸𞤵𞥅𞤲'𞤣𞤫 𞤸𞤭𞤥𞥆𞤵𞤲'𞤣𞤫 𞤫 𞤪𞤵𞥅𞤸𞤵⹁ 𞤫 𞤧𞤫𞤸𞤭𞤤𞤢𞥄𞤺𞤢𞤤⹁ 𞤫 𞤲'𞤺𞤵𞥅𞤪𞤢 𞤃𞤭𞤧𞤪𞤢𞤲𞤢𞥄𞤩𞤫 𞥖𞤮𞥅𞤴𞥖𞤫. 𞤑𞤮 𞤶𞤢𞤱𞤣𞤭 𞤩𞤵𞤪𞤭 𞤼𞤫𞥅𞤽𞤼𞤵𞤣𞤫 𞤫 𞤶𞤢𞤱𞤣𞤭 ⁏ 𞤲'𞤶𞤵𞤩𞥆𞤵𞤣𞤭 𞤲'𞤣𞤭𞥅 𞤭𞤲𞤢 𞤥𞤮𞥅𞤬𞤼𞤢 𞤲'𞤶𞤮𞤩𞤣𞤭 𞤶𞤢𞤱𞤣𞤭 𞤫 𞤲'𞤣𞤫𞤪 𞤦𞤭𞤲𞤣𞤭𞤼𞤢𞤺𞤮𞤤 𞤲'𞤺𞤮𞤤⹁ 𞤼𞤫𞥅 𞤥𞤢𞤱𞤲𞤵𞤺𞤮𞤤 𞤶𞤢𞤱𞤣𞤭 𞤲'𞤣𞤭𞥅 𞤭𞤲𞤢 𞤸𞤮𞤤𞥆𞤭𞤼𞤢 𞤼𞤫𞤣𞥆𞤵𞤲'𞤺𞤢𞤤 𞤫 𞤲𞤢𞤬𞤮𞥅𞤪𞤫 𞤫𞤧𞤼𞤢𞥄𞤣 𞤱𞤢𞤤𞥆𞤢 𞤼𞤫𞤥𞤨𞤤𞤫 𞤶𞤫𞤴𞤢𞥄𞤯𞤮 𞤫 𞤥𞤵𞤥. 𞤘𞤢𞥄𞤺𞤢𞥄 𞤶𞤢𞤱𞤣𞤭⹁ 𞤃𞤭𞤧𞤪𞤢𞤲𞤢𞥄𞤩𞤫 𞤩𞤮𞥅𞤴𞤩𞤫 𞤭𞤲𞤢 𞤲'𞤣𞤫𞤥𞤢 𞤦𞤢𞥄𞤤𞤭⹁ 𞤦𞤫’𞤭 𞤫 𞤦𞤢𞥄𞤤𞤭. 𞤑𞤮𞤧𞤢𞤥⹁ 𞤳𞤮 𞤱𞤢𞤴𞤭 𞤲𞤮 𞤰𞤭𞤴𞤫⹁ 𞤰𞤭𞤴𞤫⹁ 𞤫 𞤰𞤭𞤴𞤫⹁ 𞤭𞤲𞤢 𞤲𞤢𞤲𞤺𞤫𞥅 𞤫 𞤤𞤢𞤴𞤤𞤢𞤴𞤼𞤭⹁ 𞤭𞤲𞤢 𞤲'𞤣𞤫𞤥𞤢 𞤫 𞤲'𞤣𞤫𞤪 𞤺𞤫𞤧𞤫⹁ 𞤭𞤲𞤢 𞤻𞤢𞤥𞤤𞤫𞥅 𞤣𞤮𞥅𞤤𞤫 𞤲'𞤺𞤢𞤥 𞤩𞤵𞥅𞤩𞤲𞤵𞤣𞤫 𞤯𞤵𞤥 𞤫𞤲. [𞥙𞥔] 𞤃𞤢𞥄𞤴𞤮 𞤐𞤭𞥅𞤤 𞤭𞤲𞤢 𞤪𞤮𞤳𞥆𞤢 𞤤𞤭𞤯𞥆𞤭 𞤳𞤫𞥅𞤱𞤯𞤭. 𞤄𞤫𞥅𞤤𞤭 𞤳𞤢𞤣𞤭 𞤭𞤲𞤢 𞤲'𞤶𞤵𞥅𞤼𞤫𞥅 𞤺𞤭𞤤𞤢 𞤳𞤮 𞤬𞤢𞤥𞤯𞤭 𞤬𞤮𞤬 𞤫 𞤂𞤢𞥄𞤥𞤵 𞤩𞤮𞥅𞤴𞤲'𞤺𞤵⹁ 𞤭𞤲𞤢 𞤲'𞤣𞤮𞤳𞥆𞤢 𞤲'𞤶𞤵𞥅𞤥𞤪𞤭 𞤫 𞤲'𞤶𞤵𞥅𞤥𞤪𞤭.

𞤊𞤭𞤤𞥆𞤵

𞤃𞤭𞤧𞤪𞤢𞤲𞤢𞥄𞤩𞤫 𞤩𞤮𞥅𞤴𞤩𞤫 𞤭𞤲𞤢 𞤲'𞤶𞤵𞤤𞤢 𞤫 𞤸𞤮𞤯𞤣𞤭𞥅𞤩𞤫 𞤥𞤵𞤥 𞤫𞤲 𞤶𞤢𞤲𞤢𞤲𞤩𞤫 𞤲'𞤺𞤢𞤥 𞤸𞤫𞤩𞤣𞤫 𞤺𞤫𞤯𞤫 𞤳𞤫𞥅𞤱𞤯𞤫⹁ 𞤯𞤫 𞤩𞤫 𞤳𞤫𞤩𞤢𞤼𞤢𞥄 𞤫 𞤃𞤭𞤧𞤪𞤢. 𞤉 𞤶𞤢𞤥𞤢𞥄𞤲𞤵 𞤆𞤪𞤫𞤶𞤲𞤢𞤧𞤼𞤭𞤷⹁ 𞤩𞤫 𞤲'𞤦𞤢𞤯𞤭 𞤲'𞤶𞤵𞤤𞤢𞥄𞤺𞤵 𞤫 𞤐𞤵𞤦𞤭 𞤲'𞤺𞤢𞤥 𞤸𞤫𞤩𞤣𞤫 𞤳𞤢𞤽𞥆𞤫 𞤫 𞤵𞥅𞤪𞤣𞤭. 𞤇𞤫 𞤲'𞤣𞤢𞤪𞤲𞤭 𞤳𞤢𞤣𞤭 𞤲'𞤶𞤵𞤤𞤢𞥄𞤺𞤵 𞤫 𞤆𞤢𞤤𞤫𞤧𞤼𞤭𞥅𞤲⹁ 𞤳𞤮 𞤯𞤵𞤥 𞤧𞤫𞥅𞤣𞤢𞥄 𞤫 𞤶𞤵𞥅𞤯𞤫 𞤲𞤫𞤦𞤢𞤥 𞤯𞤫 𞤆𞤢𞤤𞤫𞤧𞤼𞤭𞥅𞤲𞥆𞤢𞥄𞤩𞤫 𞤲'𞤶𞤭𞤴𞤼𞤭 𞤫 𞤲'𞤣𞤫𞤪 𞤺𞤫𞤲𞤢𞥄𞤤𞤫 𞤬𞤭𞤪𞤢𞤱𞤲𞤢 𞤫𞤲 𞤤𞤢𞥄𞤥𞤵 𞤺𞤢𞤣𞤢𞤲𞤮. [𞥑𞥐𞥕] 𞤑𞤮𞤤𞤮𞤲𞤭 𞤃𞤭𞤧𞤪𞤢 𞤶𞤮𞥅𞤯𞤭𞥅𞤯𞤮 𞤼𞤮 𞤬𞤵𞤯𞤲𞤢𞥄𞤲'𞤺𞤫 𞤑𞤢𞤲𞤢𞥄𞤲 𞤭𞤲𞤢 𞤴𞤢𞤸𞤪𞤢 𞤫 𞤳𞤮 𞤢𞤣𞤭𞥅 𞤧𞤫𞥅𞤯𞤢 𞤂𞤢𞥄𞤥𞤵 𞤺𞤢𞤣𞤢𞤲𞤮. [𞥑𞥐𞥖] 𞤚𞤫𞤤𞥆 𞤫𞤧-𞤅𞤢𞤳𞤢𞤲⹁ 𞤫 𞤲'𞤣𞤫𞤪 𞤘𞤢𞥁𞤢 𞤸𞤢𞤲𞤣𞤫 𞤮𞥅⹁ 𞤧𞤮𞤧𞤢𞥄 𞤳𞤮 𞤫 𞤳𞤮𞤤𞤮𞤲𞤭 𞤃𞤭𞤧𞤪𞤢 𞤫 𞤣𞤢𞤪𞤮𞤪𞤯𞤫 𞤵𞤶𞤵𞤲𞥆𞤢𞥄𞤶𞤫 𞥔𞤩𞤭𞥅𞤪𞤫 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄⹁ 𞤭𞤲𞤢 𞤧𞤭𞤳𞥆𞤢𞥄 𞤳𞤮 𞤳𞤢𞤻𞤵𞤥 𞤱𞤮𞤲𞤭 𞤲𞤮𞤳𞥆𞤵 𞤳𞤮𞤤𞤮𞤻𞤢𞥄𞤤 𞤃𞤭𞤧𞤪𞤢 𞤩𞤵𞤪𞤯𞤮 𞤥𞤢𞤱𞤲𞤵𞤣𞤫 𞤫 𞤲'𞤣𞤫𞤪 𞤣𞤭𞥅𞤱𞤢𞥄𞤲 𞤸𞤫𞥅. [𞥑𞥐𞥗] 𞤐𞤢𞤪𞤥𞤫𞤪 𞤱𞤢𞤯𞤭𞥅 𞤨𞤮𞤯𞥆𞤫 𞤃𞤭𞤧𞤪𞤢 𞤨𞤫𞥅𞤱𞤲𞤭𞤪𞤼𞤫𞥅𞤯𞤫 𞤼𞤮 𞤑𞤢𞤲𞤢𞥄𞤲⹁ 𞤮 𞤴𞤢𞤤𞤼𞤭𞤲𞤭 𞤯𞤫 𞤼𞤮 𞤃𞤭𞤧𞤭𞤪𞤢.

𞤯𞤫𞤥𞤯𞤫

𞤃𞤭𞤧𞤪𞤢 𞤳𞤮 𞤯𞤫𞤥𞤲'𞤺𞤢𞤤 𞤱𞤮𞤪𞤺𞤮 𞤀𞤬𞤪𞤮-𞤀𞥄𞤧𞤭⹁ 𞤩𞤢𞤣𞤭𞥅𞤯𞤮 𞤯𞤫𞤥𞤯𞤫 𞤄𞤫𞤪𞤦𞤫𞥅𞤪 𞤫 𞤅𞤫𞤥𞤭𞤼𞤭𞤳. [𞥑𞥑𞥒] 𞤁𞤢𞥄𞤪𞤼𞤮𞤤 𞤥𞤢𞤺𞥆𞤮𞤤 𞤩𞤵𞤪𞤭 𞤶𞤵𞥅𞤼𞤣𞤫 𞤫 𞤯𞤫𞤥𞤯𞤫 𞤳𞤢𞤤𞤢⹁ 𞤧𞤭𞤦𞤵 𞤲'𞤺𞤮𞤤 𞤱𞤭𞤲𞤣𞤢𞥄 𞤳𞤮 𞤸𞤫𞤣𞥆𞤫 𞤸𞤭𞤼𞤢𞥄𞤲'𞤣𞤫 𞥓𞥒𞥐𞥐 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄. 𞤄𞤕 𞤸𞤢𞥄 𞤫 𞤴𞤮𞤲𞤼𞤢𞥄𞤶𞤭 𞤸𞤢𞤳𞥆𞤵𞤲'𞤣𞤫𞥅𞤶𞤭 𞤫 𞤲'𞤣𞤫 𞤱𞤮𞤲𞥆𞤮𞥅 𞤳𞤮 𞤯𞤫𞤥𞤲'𞤺𞤢𞤤 𞤸𞤢𞥄𞤤𞤼𞤫𞥅𞤲'𞤺𞤢𞤤 𞤩𞤵𞤪𞤭 𞤶𞤵𞥅𞤼𞤣𞤫. 𞤊𞤢𞥄𞤲'𞤣𞤢𞥄𞤪𞤫 𞤃𞤭𞤧𞤪𞤢 𞤩𞤮𞥅𞤴𞤯𞤮 𞤳𞤮 𞤃𞤭𞤧𞤪𞤢 𞤨𞤵𞤯𞥆𞤢𞤲𞤮𞥅𞤯𞤮⹁ 𞤃𞤭𞤧𞤪𞤢 𞤸𞤢𞤳𞥆𞤵𞤲'𞤣𞤫𞥅𞤶𞤮 (𞤃𞤭𞤧𞤪𞤢 𞤩𞤮𞥅𞤴𞤯𞤮)⹁ 𞤃𞤭𞤧𞤪𞤢 𞤷𞤢𞤳𞥆𞤭𞤼𞤭𞥅𞤯𞤮⹁ 𞤁𞤫𞤥𞤮𞤼𞤭𞤳⹁ 𞤫 𞤑𞤮𞤨𞤼𞤭𞤳. [𞥑𞥑𞥓] 𞤄𞤭𞤲𞤣𞤭 𞤃𞤭𞤧𞤪𞤢 𞤸𞤮𞤤𞥆𞤭𞤪𞤼𞤢𞥄 𞤷𞤫𞥅𞤪𞤼𞤵𞤺𞤮𞤤 𞤯𞤫𞤥𞤯𞤫 𞤳𞤮 𞤢𞤣𞤭𞥅 𞤑𞤮𞤨𞤼𞤭𞤳⹁ 𞤳𞤮𞤲𞤮 𞤭𞤲𞤢 𞤺𞤢𞤧𞤢 𞤼𞤢𞤱𞤢 𞤳𞤮 𞤫 𞤯𞤫𞤥𞤯𞤫 𞤣𞤭𞥅𞤱𞤢𞥄𞤲𞤵𞥅𞤶𞤭 𞤧𞤢𞤪𞤢𞥄𞤶𞤭 𞤃𞤫𞤥𞤬𞤭𞤧 𞤫 𞤷𞤢𞤺𞥆𞤢𞤤 𞤥𞤵𞤥 𞤚𞤫𞤦𞤫𞤧. [𞥑𞥑𞥔]

𞤃𞤭𞤧𞤪𞤢 𞤩𞤮𞥅𞤴𞤯𞤮 𞤳𞤮 𞤯𞤫𞤥𞤲'𞤺𞤢𞤤 𞤧𞤭𞤲𞤼𞤫𞤼𞤭𞤳⹁ 𞤳𞤮𞤲𞤮 𞤷𞤢𞤺𞥆𞤢𞤤 𞤯𞤵𞥅𞤥 𞤲'𞤺𞤢𞤤 𞤩𞤫𞤴𞤣𞤭𞥅 𞤸𞤭𞥅𞤧𞤢𞥄𞤣𞤫. 𞤉𞤶𞤭𞤨𞤼𞤲𞤢𞥄𞤩𞤫 𞤩𞤫𞤲𞥆𞤵𞤩𞤫 𞤩𞤫𞥅 𞤰𞤫𞤼𞥆𞤭𞥅 𞤦𞤭𞤲𞤣𞤢𞤲𞤯𞤫 𞤤𞤢𞥄𞤩𞤼𞤵𞤯𞤫 𞤫 𞤦𞤭𞤲𞤣𞤢𞤲𞤯𞤫 𞤤𞤢𞥄𞤩𞤼𞤵𞤯𞤫⹁ 𞤯𞤫 𞤤𞤮𞤥𞤼𞤭𞥅 𞤶𞤮𞤳𞥆𞤮𞤲'𞤣𞤭𞤪𞤫 𞤩𞤮𞥅𞤴𞤯𞤫. 𞤏𞤮𞤲𞥆𞤮 𞤳𞤮 𞤱𞤢𞤴𞤤𞤮-𞤱𞤢𞤴𞤤𞤮 𞤵𞤥𞥆𞤮𞤪𞤢𞥄𞤣𞤫 𞤫 𞤣𞤮𞤺𞥆𞤮𞤤 𞤳𞤮𞤲𞤺𞤵𞤯𞤭 𞤩𞤮𞥅𞤴𞤲'𞤺𞤮𞤤 𞤺𞤮𞤤𞥆𞤢𞤤-𞤧𞤵𞤦𞤶𞤫𞤷𞤼-𞤮𞤦𞤶𞤫𞤷𞤼 𞤬𞤫𞥅𞤱𞤣𞤫 𞤫 𞤧𞤵𞤦𞤶𞤫𞤷𞤼-𞤮𞤦𞤶𞤫𞤷𞤼. [𞥑𞥑𞥕] 𞤄𞤭𞤲𞤣𞤭 𞤸𞤭𞤫𞤪𞤮𞤺𞤤𞤭𞤬𞤭𞤳⹁ 𞤸𞤭𞤫𞤪𞤢𞤼𞤭𞤳⹁ 𞤫 𞤣𞤫𞤥𞤮𞤼𞤭𞤳 𞤉𞤶𞤭𞤨𞤼⹁ 𞤸𞤢𞥄 𞤶𞤮𞥅𞤲𞤭 𞤤𞤮𞤥𞤼𞤭𞤲𞤢𞥄𞤥𞤢 𞤫 𞤢𞤤𞤳𞤵𞤤𞤫 𞤳𞤮𞤨𞤼𞤭𞤳 𞤩𞤵𞤪𞤯𞤫 𞤬𞤮𞤲𞤫𞤼𞤭𞤳. 𞤑𞤮𞤨𞤼𞤭𞤳 𞤭𞤲𞤢 𞤸𞤵𞥅𞤼𞤮𞤪𞤫𞥅 𞤸𞤢𞥄 𞤶𞤮𞥅𞤲𞤭 𞤫 𞤲'𞤣𞤫𞤪 𞤣𞤭𞥅𞤲𞤫𞥅𞤶𞤭 𞤉𞤳𞤤𞤫𞤧𞤭𞤴𞤢 𞤌𞤪𞤼𞤮𞤣𞤮𞤳𞤧 𞤃𞤭𞤧𞤪𞤢⹁ 𞤳𞤢𞤣𞤭 𞤦𞤢𞤼𞥆𞤫 𞤥𞤵𞤥 𞤭𞤲𞤢 𞤼𞤢𞤱𞤫𞥅 𞤫 𞤯𞤫𞤥𞤲'𞤺𞤢𞤤 𞤀𞤪𞤢𞤦 𞤃𞤭𞤧𞤪𞤢 𞤸𞤢𞤲𞤣𞤫.

𞤣𞤭𞥅𞤲𞤢

𞤑𞤮 𞤩𞤵𞤪𞤭 𞤸𞤫𞥅𞤱𞤣𞤫 𞤫 𞤃𞤭𞤧𞤪𞤢𞤲𞤢𞥄𞤩𞤫 𞤩𞤮𞥅𞤴𞤩𞤫 𞤳𞤮 𞤪𞤫𞤥𞤮𞥅𞤩𞤫 𞤤𞤫𞤴𞤣𞤭. 𞤖𞤮𞤯𞤮𞤪𞤣𞤫 𞤥𞤢𞤩𞥆𞤫 𞤳𞤮 𞤲'𞤺𞤢𞤥 𞤩𞤫𞤧𞤲'𞤺𞤵 𞤲'𞤺𞤵𞥅 𞤼𞤢𞤲⹁ 𞤩𞤫 𞤲'𞤦𞤢𞤯𞤭 𞤳𞤮 𞤫 𞤦𞤭𞤪𞤭𞤳𞤵𞥅𞤶𞤭 𞤤𞤮𞥅𞤨𞤫⹁ 𞤦𞤢𞤯𞤢𞥄𞤯𞤭 𞤲'𞤺𞤢𞤥 𞤱𞤢𞥄𞤱𞤣𞤫 𞤩𞤵𞥅𞤩𞤣𞤫 𞤫 𞤲'𞤺𞤵𞤤𞤫𞥅𞤳𞤭 𞤻𞤢𞤤𞤢𞤱𞤥𞤢. 𞤘𞤢𞤤𞥆𞤫 𞤬𞤮𞤬 𞤭𞤲𞤢 𞤶𞤮𞤺𞤭𞤲𞤮𞥅 𞤧𞤵𞥅𞤣𞤵 𞤩𞤵𞥅𞤩𞤲'𞤣𞤵⹁ 𞤭𞤲𞤢 𞤱𞤢𞤯𞤭 𞤳𞤢𞥄𞤰𞤫 𞤩𞤵𞤼𞥆𞤫 𞤲'𞤺𞤢𞤥 𞤩𞤵𞥅𞤩𞤲𞤵𞤣𞤫 𞤺𞤢𞤱𞤪𞤭 𞤫 𞤤𞤮𞤱𞤪𞤫 𞤼𞤮𞤳𞤮𞤧𞤫𞤪𞤫 𞤲'𞤺𞤢𞤥 𞤩𞤵𞥅𞤩𞤲𞤵𞤣𞤫 𞤲'𞤦𞤵𞤪𞤵. [𞥑𞥓𞥔] 𞤅𞤫𞤪𞤢𞤥𞤭𞤳 𞤭𞤲𞤢 𞤱𞤢𞤯𞤭 𞤺𞤫𞤯𞤫 𞤺𞤢𞤤𞥆𞤫𞥅𞤶𞤭 𞤲'𞤺𞤢𞤥 𞤥𞤮𞥅𞤬𞤼𞤵𞤣𞤫⹁ 𞤬𞤫𞥅𞤱𞤲𞤵𞤣𞤫⹁ 𞤲𞤢𞤱𞤣𞤫⹁ 𞤫 𞤻𞤢𞥄𞤥𞤣𞤫 𞤲'𞤺𞤵𞥅𞤪𞤢⹁ 𞤲'𞤶𞤢𞤪𞤢𞤥⹁ 𞤫 𞤺𞤫𞤯𞤫 𞤲'𞤦𞤢𞤴𞤤𞤢𞥄𞤲'𞤣𞤭. 𞤑𞤮𞤯𞤮𞤪𞤯𞤫 𞤯𞤫𞥅 𞤭𞤲𞤢 𞤨𞤫𞤲𞤼𞤭𞤪𞤫𞥅 𞤣𞤢𞤲𞤫𞥅𞤶𞤫⹁ 𞤭𞤲𞤢 𞤲'𞤦𞤢𞥄𞤱𞤭 𞤵𞤣𞥆𞤫𞥅𞤣𞤫 𞤫 𞤲'𞤦𞤢𞤴𞤣𞤭𞥅𞤶𞤭 𞤤𞤭𞤯𞥆𞤭 𞤣𞤢𞤲𞤫𞥅𞤶𞤭. 𞤂𞤫𞤯𞥆𞤫 𞤯𞤫𞥅 𞤭𞤲𞤢 𞤲'𞤶𞤵𞤩𞥆𞤭𞤲𞤢𞥄 𞤫 𞤽𞤮𞤪𞤢𞤤⹁ 𞤼𞤢𞤱𞤭 𞤳𞤮 𞤽𞤮𞤪𞤢𞤤 𞤤𞤫𞤯𞥆𞤫⹁ 𞤤𞤫𞤯𞥆𞤫 𞤰𞤫𞤼𞥆𞤢𞥄𞤯𞤫 𞤫 𞤤𞤫𞤴𞤣𞤭 𞤫 𞤼𞤢𞥄𞤦𞤢𞤤 𞤺𞤮𞥅𞤼𞤮 𞤺𞤮𞥅𞤼𞤮 𞤭𞤲𞤢 𞤲'𞤦𞤢𞤯𞤭 𞤥𞤮𞤦𞤫𞤤𞤢𞥄𞤶𞤭 𞤯𞤭𞥅.

𞤲𞤣𞤫𞤬𞤵

𞤁𞤮𞤺𞥆𞤮𞤤 𞤷𞤮𞤤𞥆𞤭 𞤨𞤭𞤶𞤭𞤪𞤤𞤮𞥅𞤶𞤭 𞤫 𞤪𞤫𞤥𞤣𞤫 𞤲'𞤺𞤫𞤧𞤢⹁ 𞤴𞤢𞤲𞤢𞥄𞤲'𞤣𞤫 𞤐𞤫𞤬𞤫𞤪𞤥𞤢𞥄𞤼 𞤫 𞤣𞤫𞤦𞥆𞤮 𞤥𞤵𞤥 𞤋𞤼𞤫𞤼 (𞤸𞤫𞤣𞥆𞤫 𞥒𞥗𞥐𞥐 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄)

𞤕𞤵𞤭𞤧𞤭𞤲𞤫 𞤃𞤭𞤧𞤪𞤢 𞤭𞤲𞤢 𞤸𞤫𞤣𞥆𞤭𞥅 𞤫 𞤣𞤢𞤪𞤲'𞤣𞤫 𞤸𞤢𞥄𞤱𞤲𞤭𞥅𞤲'𞤣𞤫 𞤫 𞤲'𞤣𞤫𞤪 𞤴𞤮𞤲𞤼𞤢𞥄𞤶𞤭. 𞤐'𞤁𞤫𞤳𞤫⹁ 𞤳𞤮𞤯𞤳𞤭 𞤉𞤶𞤭𞤨𞤼 𞤸𞤢𞤲𞤣𞤫 𞤭𞤲𞤢 𞤶𞤮𞤺𞤭𞥅 𞤲𞤢𞤲𞤣𞤮𞤤𞥆𞤢𞥄𞤶𞤭 𞤳𞤫𞥅𞤱𞤯𞤭 𞤫 𞤳𞤮𞤯𞤳𞤭 𞤩𞤮𞥅𞤴𞤯𞤭. 𞤙𞤢𞥄𞤥𞤣𞤵 𞤩𞤵𞤪𞤲'𞤣𞤵 𞤸𞤫𞥅𞤱𞤣𞤫 𞤳𞤮 𞤲'𞤦𞤵𞤪𞤵 𞤫 𞤦𞤭𞥅𞤪⹁ 𞤩𞤫𞤴𞤣𞤫𞥅 𞤸𞤫𞥅𞤲 𞤤𞤫𞤯𞥆𞤫 𞤳𞤮 𞤱𞤢𞤴𞤭 𞤲𞤮 𞤲'𞤶𞤵𞥅𞤥𞤪𞤭 𞤫 𞤤𞤢𞥄𞤴⹁ 𞤫 𞤩𞤭𞤩𞥆𞤫 𞤤𞤫𞤯𞥆𞤫 𞤳𞤮 𞤱𞤢𞤴𞤭 𞤲𞤮 𞤣𞤢𞤼𞤫 𞤫 𞤬𞤭𞤶𞤭𞤪𞤣𞤫. 𞤏𞤭𞤲𞤣𞤫𞤪𞤫 𞤫 𞤳𞤮𞤧𞤢𞤥 𞤭𞤲𞤢 𞤲'𞤦𞤫𞤤𞤼𞤭𞥅 𞤫 𞤻𞤢𞤤𞤯𞤭 𞤶𞤵𞥅𞤤𞤣𞤫 𞤯𞤭𞥅 𞤬𞤮𞤬⹁ 𞤼𞤢𞤱𞤭 𞤲𞤮𞥅𞤲 𞤴𞤭𞤥𞤩𞤫 𞤼𞤮𞥅𞤱𞤩𞤫 𞤩𞤫𞥅 𞤩𞤵𞤪𞤭 𞤱𞤫𞤤𞤣𞤫 𞤸𞤫𞥅𞤲. 𞤂𞤭𞤯𞥆𞤭⹁ 𞤳𞤮𞤧𞤢𞤥⹁ 𞤫 𞤳𞤮𞤧𞤢𞤥 𞤭𞤲𞤢 𞤲'𞤦𞤢𞥄𞤱𞤭 𞤩𞤵𞥅𞤩𞤲𞤫𞥅𞤣𞤫 𞤱𞤢𞤤𞥆𞤢 𞤩𞤵𞥅𞤩𞤲𞤫𞥅𞤣𞤫⹁ 𞤩𞤵𞥅𞤩𞤲𞤫𞥅 𞤱𞤢𞤤𞥆𞤢 𞤩𞤵𞥅𞤩𞤲𞤫𞥅 𞤫 𞤣𞤮𞤱 𞤽𞤮𞤪𞤢𞤤. [𞥑𞥔𞥒]

𞤥𞤢𞤸𞤮𞥅𞤣𞤭

𞤃𞤢𞤸𞤣𞤭 𞤃𞤭𞤧𞤪𞤢 𞤩𞤮𞥅𞤴𞤲'𞤣𞤭 𞤭𞤲𞤢 𞤱𞤢𞤯𞤭 𞤴𞤮𞤺𞤢 𞤫 𞤥𞤢𞤸𞤣𞤭𞥅𞤶𞤭 𞤩𞤵𞤪𞤯𞤭 𞤤𞤮𞤤𞥆𞤵𞤣𞤫 𞤫 𞤱𞤭𞤲𞤣𞤫𞤪𞤫 𞤲'𞤣𞤫: 𞤨𞤭𞤪𞤢𞤥𞤭𞤣𞤵𞥅𞤶𞤭 𞤥𞤢𞤱𞤯𞤭 𞤘𞤭𞥁𞤢 𞤫 𞤷𞤵𞥅𞤯𞤭 𞤣𞤫𞤱𞤢𞤤 𞤚𞤫𞤦𞤫𞤧. 𞤉𞤩𞥆𞤢𞥄𞤯𞤫 𞤥𞤢𞤸𞤲'𞤺𞤮 𞤯𞤫𞥅⹁ 𞤳𞤮 𞤣𞤮𞤱𞤤𞤢 𞤴𞤵𞤩𞥆𞤭𞤲𞤭⹁ 𞤪𞤮𞤳𞥆𞤭 𞤯𞤵𞤥 𞤳𞤢𞥄𞤤𞤭𞤧 𞤲'𞤺𞤢𞤥 𞤣𞤭𞥅𞤲𞤫 𞤫 𞤧𞤭𞤬𞤼𞤮𞤪𞤣𞤫⹁ 𞤳𞤮𞤲𞤮 𞤳𞤢𞤣𞤭 𞤲'𞤺𞤢𞤥 𞤧𞤫𞤥𞤦𞤭𞤲'𞤣𞤫 𞤣𞤮𞥅𞤤𞤫 𞤬𞤭𞤪𞤢𞥄𞤱𞤲𞤢 𞤴𞤢𞥄𞤶𞤯𞤫. 𞤃𞤭𞤧𞤪𞤢𞤲𞤢𞥄𞤩𞤫 𞤩𞤮𞥅𞤴𞤩𞤫 𞤳𞤮 𞤥𞤢𞤸𞤮𞥅𞤩𞤫 𞤱𞤢𞥄𞤱𞤩𞤫⁏ 𞤸𞤵𞥅𞤼𞤮𞤪𞤢𞥄𞤣𞤫 𞤼𞤢𞤲 𞤳𞤵𞥅𞤼𞤮𞤪𞤯𞤫 𞤳𞤮𞤴𞤯𞤫 𞤳𞤮𞤲𞤮 𞤦𞤢𞥄𞤱𞤯𞤫 𞤸𞤵𞥅𞤼𞤮𞤪𞤫𞥅𞤣𞤫 𞤫 𞤳𞤵𞥅𞤼𞤮𞤪𞤯𞤫 𞤴𞤭𞤴𞤤𞤮𞤼𞤮𞥅𞤯𞤫⹁ 𞤥𞤢𞤸𞤮𞥅𞤩𞤫 𞤭𞤲𞤢 𞤲'𞤦𞤢𞥄𞤱𞤭 𞤥𞤢𞤸𞤣𞤫 𞤷𞤵𞥅𞤯𞤭 𞤳𞤢𞥄𞤰𞤫 𞤥𞤢𞤱𞤯𞤭 𞤫 𞤤𞤢𞥄𞤩𞤢𞤤 𞤥𞤢𞤱𞤲'𞤺𞤢𞤤⹁ 𞤲'𞤺𞤢𞤤 𞤸𞤢𞥄 𞤸𞤢𞤲𞤣𞤫 𞤭𞤲𞤢 𞤴𞤭𞤯𞤭.

𞤋𞤪𞤭𞤲

𞤃𞤭𞤧𞤪𞤢𞤲𞤢𞥄𞤩𞤫 𞤩𞤮𞥅𞤴𞤩𞤫 𞤭𞤲𞤢 𞤨𞤫𞥅𞤱𞤲𞤭 𞤲𞤢𞥄𞤤𞤢𞤲𞤳𞤢𞥄𞤺𞤢𞤤 𞤲'𞤺𞤢𞤥 𞤺𞤮𞤤𞥆𞤮𞤪𞤢𞥄𞤣𞤫. 𞤑𞤮 𞤩𞤵𞤪𞤭 𞤣𞤵𞥅𞤩𞤭 𞥓 𞥕𞥐𞥐⹁ 𞤲𞤢𞥄𞤤𞤢𞤲𞤳𞤮𞥅𞤩𞤫 𞤭𞤲𞤢 𞤲'𞤶𞤮𞤳𞥆𞤭 𞤫 𞤲'𞤦𞤢𞥄𞤣𞤭𞥅𞤶𞤭 𞤲𞤢𞥄𞤤𞤢𞤲𞤳𞤢𞥄𞤺𞤢𞤤 𞤫 𞤭𞤳𞤮𞤲𞤮𞤺𞤢𞤪𞤢𞥄𞤬𞤭 𞤰𞤫𞤤𞥆𞤭𞤼𞤭𞥅𞤯𞤭 𞤫 𞤲'𞤣𞤫𞤪 𞤂𞤢𞥄𞤥𞤵 𞤩𞤮𞥅𞤴𞤲'𞤺𞤵⹁ 𞤭𞤲𞤢 𞤲'𞤶𞤮𞤳𞥆𞤭 𞤫 𞤣𞤮𞥅𞤧𞤯𞤫 𞤼𞤭𞥅𞤯𞥆𞤫⹁ 𞤯𞤫 𞤲'𞤣𞤢𞤪𞤼𞤭𞤲𞤭𞥅 𞤦𞤢𞤼𞥆𞤫 𞤶𞤢𞤲𞤢𞤲𞤫 𞤫 𞤱𞤢𞤴𞤤𞤮𞥅𞤶𞤭 𞤲'𞤣𞤫𞤪 𞤤𞤫𞤴𞤣𞤭. [𞥑𞥔𞥘] 𞤍𞤫𞥅 𞤯𞤮𞥅 𞤼𞤮𞤤𞤲𞤮𞥅𞤶𞤭 𞤲𞤢𞥄𞤤𞤢𞤲𞤳𞤢𞥄𞤺𞤢𞤤 – 𞤣𞤭𞥅𞤣𞤭 𞤳𞤮𞤴𞤯𞤭⹁ 𞤲'𞤦𞤢𞥄𞤣𞤭𞥅𞤶𞤭 𞤫 𞤲𞤮𞤳𞥆𞤵𞥅𞤶𞤭 𞤩𞤵𞤼𞥆𞤭𞤯𞤭 𞤷𞤮𞤤𞤮𞤵𞤪 𞤸𞤢𞤱𞤪𞤢𞥄𞤯𞤭 𞤫 𞤧𞤭𞤬𞤢𞥄𞤶𞤭 𞤩𞤵𞤼𞥆𞤭𞤯𞤭 𞤤𞤭𞤥𞤼𞤮𞥅𞤶𞤭 𞤼𞤢𞤱𞤢 𞤳𞤮𞤤𞥆𞤭𞤼𞤮𞥅𞤶𞤭 𞤤𞤵𞤺𞥆𞤭𞤯𞤺𞤮𞤤 𞤲𞤮𞤳𞥆𞤵 – 𞤭𞤲𞤢 𞤲'𞤦𞤢𞤯𞤭 𞤶𞤭𞤳𞥆𞤵 𞤲'𞤶𞤵𞤩𞥆𞤵𞤣𞤭 𞤫 𞤦𞤢𞤤𞥆𞤮𞤲'𞤣𞤭𞤪𞤢𞤤 𞤫 𞤲'𞤣𞤫𞤪 𞤳𞤮𞤥𞤨𞤮𞤻𞥆𞤫.

𞤘𞤮𞥅𞤥𞤯𞤭𞤲𞤢𞤤

𞤘𞤮𞥅𞤲'𞤺𞤯𞤭𞤲𞤢𞤤 𞤳𞤮 𞤬𞤢𞤴𞤼𞤭 𞤫 𞤣𞤭𞥅𞤲𞤫𞥅𞤶𞤭 𞤫 𞤷𞤢𞤺𞥆𞤢𞤤 𞤥𞤢𞥄𞤴𞤣𞤫 𞤭𞤲𞤢 𞤼𞤢𞤱𞤫𞥅 𞤫 𞤧𞤭𞤱𞤭𞤤 𞤃𞤭𞤧𞤪𞤢 𞤩𞤮𞥅𞤴𞤯𞤮 𞤺𞤭𞤤𞤢 𞤫 𞤬𞤵𞤯𞥆𞤮𞥅𞤣𞤫 𞤥𞤵𞤥 ⁏ 𞤂𞤢𞥄𞤥𞤵 𞤊𞤭𞤪𞤢𞤱𞤲𞤢 𞤼𞤵𞥅𞤺𞤭𞥅 𞤳𞤮 𞤫 𞤸𞤢𞤳𞥆𞤫 𞤤𞤢𞥄𞤥𞤩𞤫. 𞤆𞤢𞤲𞤼𞤸𞤫𞤮𞤲 𞤉𞤶𞤭𞤨𞤼 𞤭𞤲𞤢 𞤸𞤮𞤯𞤭 𞤤𞤢𞥄𞤥𞤩𞤫 𞤶𞤮𞤺𞤭𞥅𞤩𞤫 𞤣𞤮𞥅𞤤𞤫 𞤩𞤵𞤪𞤯𞤫 𞤥𞤢𞤱𞤲𞤵𞤣𞤫⹁ 𞤩𞤫 𞤲𞤮𞤣𞥆𞤢𞤼𞤢 𞤲'𞤺𞤢𞤥 𞤦𞤢𞤤𞥆𞤢𞤤 𞤱𞤢𞤤𞥆𞤢 𞤲'𞤣𞤫𞥅𞤲𞤳𞤢. 𞤑𞤮𞤲𞤮 𞤤𞤢𞥄𞤥𞤩𞤫 𞤩𞤫𞥅 𞤲'𞤶𞤭𞤴𞤼𞤭𞤪𞤢𞥄𞤳𞤢 𞤳𞤮 𞤥𞤮𞤰𞥆𞤵𞤩𞤫⹁ 𞤃𞤭𞤧𞤪𞤢𞤲𞤢𞥄𞤩𞤫 𞤭𞤲𞤢 𞤲'𞤺𞤮𞥅𞤲'𞤺𞤯𞤭𞤲𞤭 𞤱𞤫𞤤𞤼𞤭𞤲'𞤣𞤫 𞤯𞤵𞤥 𞤫𞤲 𞤫 𞤧𞤢𞤣𞤢𞤳𞤫𞥅𞤶𞤭 𞤫 𞤣𞤵𞤱𞤢𞥄𞤱𞤵𞥅𞤶𞤭. 𞤅𞤭𞤬𞤢𞥄 𞤮𞥅𞤯𞤮𞥅 𞤨𞤢𞤲𞤼𞤫𞤮𞤲 𞤭𞤲𞤢 𞤱𞤢𞤴𞤤𞤮𞥅 𞤧𞤢𞤸𞤢𞥄 𞤳𞤢𞤤𞤢 𞤲'𞤣𞤫 𞤤𞤢𞥄𞤥𞤩𞤫 𞤳𞤫𞤧𞤭 𞤰𞤫𞤼𞥆𞤫𞤼𞤫𞥅 𞤫 𞤲'𞤣𞤫𞤪 𞤲'𞤶𞤵𞤩𞥆𞤵𞤣𞤭 𞤤𞤢𞥄𞤥𞤵⹁ 𞤳𞤮𞤲𞤮 𞤢𞤤𞤥𞤵𞤩𞥆𞤫 𞤩𞤫𞥅 𞤲'𞤦𞤢𞤯𞤢𞥄𞤲𞤭 𞤸𞤫𞥅𞤲 𞤣𞤮𞥅𞤤𞤫 𞤲'𞤺𞤢𞤥 𞤴𞤵𞤩𞥆𞤭𞤲'𞤣𞤫 𞤥𞤭𞥅𞤶𞤮𞥅𞤶𞤭 𞤫 𞤣𞤢𞥄𞤪𞤼𞤮𞤤 𞤷𞤫𞥅𞤪𞤼𞤵𞤯𞤭⹁ 𞤧𞤢𞤸𞤢𞥄 𞤫 𞤧𞤢𞤸𞤢𞥄 𞤬𞤮𞤬 𞤤𞤵𞥅𞤪𞤮𞤲'𞤣𞤭𞤪𞤯𞤭⹁ 𞤫 𞤲'𞤣𞤫𞤪 𞤲'𞤶𞤵𞤩𞥆𞤵𞤣𞤭 𞤶𞤮𞤳𞥆𞤮𞤲'𞤣𞤭𞤪𞤫. [𞥑𞥕𞥗] 𞤍𞤫𞥅 𞤥𞤭𞥅𞤶𞤮𞥅𞤶𞤭 𞤷𞤫𞥅𞤪𞤼𞤵𞤯𞤭 𞤫 𞤣𞤭𞥅𞤲𞤫𞥅𞤶𞤭 𞤲'𞤶𞤭𞤴𞤼𞤢𞥄𞤳𞤢 𞤲𞤮 𞤤𞤵𞥅𞤪𞤮𞤲'𞤣𞤭𞤪𞤯𞤫 𞤳𞤮𞤲𞤮 𞤳𞤮 𞤲𞤮 𞤤𞤢𞥄𞤦𞤭 𞤫 𞤲'𞤣𞤫𞤪 𞤺𞤫𞤯𞤫 𞤳𞤫𞥅𞤱𞤯𞤫 𞤺𞤮𞥅𞤲'𞤺𞤢.

𞤬𞤭𞤲𞤢𞥄 𞤼𞤢𞤱𞤢𞥄𞤶𞤭

𞤃𞤭𞤧𞤪𞤢𞤲𞤢𞥄𞤩𞤫 𞤩𞤮𞥅𞤴𞤩𞤫 𞤭𞤲𞤢 𞤲'𞤶𞤮𞤺𞤭𞤲𞤮𞥅 𞤢𞥄𞤣𞤢𞥄𞤶𞤭 𞤱𞤭𞤪𞤱𞤭𞤪𞤲'𞤣𞤫 𞤤𞤢𞥄𞤩𞤼𞤵𞤯𞤭 𞤯𞤭 𞤩𞤫 𞤷𞤭𞤳𞥆𞤢𞤼𞤲𞤮𞥅 𞤭𞤲𞤢 𞤨𞤮𞤼𞤭 𞤱𞤢𞤯𞤫𞥅𞤣𞤫 𞤲'𞤺𞤢𞤥 𞤼𞤢𞤦𞤭𞤼𞤭𞤲'𞤣𞤫 𞤥𞤢𞥄𞤴𞤣𞤫 𞤷𞤢𞤺𞥆𞤢𞤤 𞤥𞤢𞥄𞤴𞤣𞤫. 𞤍𞤫𞥅𞤯𞤮𞥅 𞤢𞥄𞤣𞤢𞥄𞤶𞤭 𞤭𞤲𞤢 𞤲'𞤦𞤢𞤯𞤭 𞤪𞤫𞥅𞤲'𞤣𞤫 𞤩𞤢𞤲𞤣𞤵 𞤲'𞤣𞤵𞥅 𞤪𞤫𞤱𞤪𞤵𞤣𞤫 𞤫 𞤥𞤵𞤥𞥆𞤭𞤲'𞤺𞤮𞤤⹁ 𞤱𞤢𞤯𞤣𞤫 𞤳𞤫𞤱𞤵𞥅𞤶𞤭 𞤱𞤭𞤪𞤱𞤭𞤪𞤲'𞤣𞤫⹁ 𞤫 𞤵𞤣𞥆𞤵𞤣𞤫 𞤫 𞤺𞤫𞤯𞤫 𞤩𞤢𞤲𞤣𞤵 𞤯𞤫 𞤥𞤢𞥄𞤴𞤯𞤮 𞤮𞥅 𞤸𞤵𞥅𞤼𞤮𞤪𞤼𞤮𞥅 𞤫 𞤲'𞤣𞤫𞤪 𞤲'𞤺𞤵𞥅𞤪𞤲'𞤣𞤢𞤥 𞤷𞤢𞤺𞥆𞤢𞤤 𞤥𞤢𞥄𞤴𞤣𞤫. [𞥑𞥕𞥒] 𞤑𞤮 𞤢𞤣𞤭𞥅 𞤂𞤢𞥄𞤥𞤵 𞤩𞤮𞥅𞤴𞤲'𞤺𞤵⹁ 𞤩𞤢𞤤𞥆𞤭 𞤲'𞤦𞤫𞤪𞤤𞤢𞥄𞤯𞤭 𞤫 𞤲'𞤣𞤫𞤪 𞤩𞤵𞤤𞥆𞤭 𞤶𞤫𞥅𞤪𞤫𞥅𞤲'𞤣𞤫 𞤭𞤲𞤢 𞤲'𞤣𞤫𞤧𞤲'𞤣𞤢𞥄 𞤫 𞤧𞤭𞤬𞤢𞥄 𞤥𞤵𞤥 𞤫 𞤴𞤮𞥅𞤪𞤺𞤮𞤤. 𞤀𞤪𞤭𞤣⹁ 𞤲'𞤺𞤮𞤲𞤳𞤢𞥄𞤶𞤭 𞤶𞤫𞥅𞤪𞤫𞥅𞤲'𞤣𞤫 𞤳𞤮 𞤦𞤢𞤤𞥆𞤢𞤤 𞤫 𞤲'𞤣𞤫𞤪 𞤣𞤢𞥄𞤪𞤼𞤮𞤤 𞤉𞤶𞤭𞤨𞤼 𞤩𞤮𞥅𞤴𞤲'𞤺𞤮𞤤 𞤲'𞤺𞤢𞤥 𞤱𞤭𞤪𞤲𞤫𞥅𞤣𞤫 𞤥𞤭𞤧𞤳𞤭𞤲𞤫𞥅𞤩𞤫⹁ 𞤩𞤫 𞤲'𞤦𞤢𞥄𞤱𞤢𞥄 𞤣𞤢𞤻𞤣𞤫 𞤨𞤫𞥅𞤶𞤫 𞤱𞤭𞤪𞤱𞤭𞤪𞤲'𞤣𞤫 𞤤𞤢𞥄𞤩𞤼𞤵𞤯𞤫 𞤯𞤫 𞤥𞤢𞤱𞤩𞤫 𞤩𞤫𞥅 𞤲'𞤦𞤢𞥄𞤱𞤭 𞤸𞤫𞤩𞤣𞤫. 𞤃𞤭𞤧𞤪𞤢𞤲𞤢𞥄𞤩𞤫 𞤩𞤵𞤪𞤩𞤫 𞤢𞤤𞤯𞤵𞤣𞤫 𞤩𞤫𞥅 𞤨𞤵𞤯𞥆𞤭𞥅𞤥𞤢 𞤱𞤭𞤪𞤲𞤵𞤣𞤫 𞤥𞤢𞥄𞤴𞤩𞤫 𞤥𞤵𞤥 𞤫𞤲 𞤫 𞤲'𞤣𞤫𞤪 𞤺𞤫𞤲𞤢𞥄𞤤𞤫 𞤳𞤢𞥄𞤰𞤫 𞤫 𞤸𞤵𞥅𞤼𞤮𞤪𞤢𞥄𞤣𞤫 𞤥𞤵𞤥𞥆𞤭𞤬𞤭𞤳𞤢𞥄𞤧𞤭𞤴𞤮𞤽 𞤢𞤪𞤼𞤭𞤬𞤭𞤷𞤭𞤫𞤤⹁ 𞤳𞤮 𞤯𞤵𞤥 𞤱𞤮𞤲𞤭 𞤭𞤼𞥆𞤵𞤣𞤫 𞤼𞤫𞤪𞤯𞤫 𞤲'𞤣𞤫𞤪𞤲'𞤣𞤫𞤪𞤭𞥅𞤶𞤫⹁ 𞤩𞤮𞥅𞤪𞤲𞤢𞥄𞤣𞤫 𞤩𞤢𞤲𞤣𞤵 𞤲'𞤣𞤵𞥅 𞤫 𞤤𞤭𞤥𞤷𞤫⹁ 𞤫 𞤵𞤣𞥆𞤵𞤣𞤫 𞤯𞤵𞤥 𞤫 𞤲'𞤣𞤫𞤪 𞤧𞤢𞤪𞤳𞤮𞤬𞤢𞥄𞤧 𞤳𞤢𞥄𞤰𞤫 𞤺𞤮𞤲𞤯𞤮 𞤫 𞤽𞤮𞤪𞤮𞤤 𞤱𞤢𞤤𞥆𞤢 𞤫 𞤳𞤫𞥅𞤧 𞤤𞤫𞤯𞥆𞤫. 𞤘𞤭𞤤𞤢 𞤫 𞤤𞤢𞥄𞤥𞤵 𞤲𞤢𞤴𞤢𞤩𞤵⹁ 𞤱𞤮𞤲 𞤸𞤫𞥅𞤲 𞤺𞤫𞤯𞤫 𞤭𞤲𞤢 𞤳𞤫𞤩𞤫𞥅 𞤷𞤫𞥅𞤪𞤼𞤵𞤯𞤫 𞤫 𞤲'𞤣𞤫𞤪 𞤶𞤢𞤪𞤣𞤵𞤯𞤫 𞤷𞤢𞤲𞤮𞤨𞤭𞤷.

𞤣𞤢𞤲𞤣𞤮𞥅𞤩𞤫

𞤑𞤮𞤲𞤵 𞤃𞤭𞤧𞤪𞤢 𞤩𞤮𞥅𞤴𞤯𞤮 𞤭𞤲𞤢 𞤶𞤮𞤺𞤭𞤲𞤮𞥅 𞤣𞤢𞤪𞤲'𞤣𞤫 𞤲'𞤺𞤢𞤥 𞤣𞤢𞤯𞤲'𞤣𞤵𞤣𞤫 𞤃𞤭𞤧𞤪𞤢 𞤫 𞤲'𞤶𞤭𞥅𞤥𞤢𞥄𞤲'𞤣𞤭 𞤶𞤢𞤲𞤢𞤲𞤩𞤫 𞤫 𞤶𞤮𞤺𞤢𞥄𞤣𞤫 𞤲'𞤶𞤭𞥅𞤥𞤢𞥄𞤲'𞤣𞤭 𞤃𞤭𞤧𞤪𞤢 𞤫 𞤲'𞤣𞤫𞤪 𞤊𞤵𞤯𞤲𞤢𞥄𞤲'𞤺𞤫 𞤩𞤢𞤣𞤭𞥅𞤯𞤮 𞤩𞤮𞥅𞤴𞤯𞤮. 𞤑𞤮𞤲𞤵 𞤲'𞤺𞤵𞥅 𞤪𞤫𞥅𞤲𞤭 𞤲'𞤶𞤭𞤤𞥆𞤵𞥅𞤶𞤭 𞤥𞤭𞤲𞤭𞤪𞤢𞥄𞤶𞤭 𞤼𞤮 𞤅𞤭𞤲𞤢𞥄 𞤫 𞤲'𞤣𞤫𞤪 𞤂𞤢𞥄𞤥𞤵 𞤩𞤮𞥅𞤴𞤲'𞤺𞤵 𞤲'𞤺𞤵𞥅⹁ 𞤭𞤲𞤢 𞤸𞤢𞤩𞤢 𞤫 𞤸𞤢𞤪𞤫𞥅𞤶𞤭 𞤲'𞤣𞤫𞤪 𞤤𞤫𞤴𞤣𞤭 𞤫 𞤲'𞤣𞤫𞤪 𞤴𞤮𞤲𞤼𞤢𞥄𞤶𞤭 𞤸𞤢𞤳𞥆𞤵𞤲'𞤣𞤫𞥅𞤶𞤭 𞤺𞤢𞤣𞤢𞤲𞤭 𞤫 𞤯𞤭𞤯𞤥𞤭. 𞤑𞤮𞤲𞤵 𞤲'𞤺𞤵𞥅 𞤭𞤲𞤢 𞤸𞤢𞤤𞤬𞤭𞤲𞤢𞥄 𞤶𞤮𞤺𞤢𞥄𞤣𞤫 𞤷𞤵𞥅𞤯𞤭 𞤫 𞤤𞤢𞥄𞤦𞤭 𞤲'𞤶𞤵𞤤𞤢𞥄𞤺𞤵 𞤼𞤫𞥅𞤽𞤼𞤵𞤯𞤭⹁ 𞤳𞤮 𞤱𞤢𞤴𞤭 𞤲𞤮 𞤯𞤭 𞤼𞤢𞤱𞤢𞥄𞤯𞤭 𞤫 𞤱𞤵𞤪𞤮 𞤄𞤵𞤸𞤫𞤲 𞤫 𞤤𞤢𞥄𞤱𞤮𞤤 𞤐𞤵𞤦𞤭𞤴𞤢. 𞤊𞤮𞤪𞤼𞤧 𞤭𞤲𞤢 𞤥𞤢𞤸𞤢𞥄 𞤳𞤢𞤣𞤭 𞤲'𞤺𞤢𞤥 𞤱𞤮𞤲'𞤣𞤫 𞤲𞤮𞤳𞥆𞤵𞥅𞤶𞤭 𞤳𞤮𞤲𞤵⹁ 𞤳𞤮 𞤱𞤢𞤴𞤭 𞤲𞤮 𞤊𞤮𞤪𞤼𞤪𞤫𞤧𞥆 𞤣𞤫 𞤅𞤭𞤤𞤫⹁ 𞤳𞤮 𞤯𞤵𞤥 𞤱𞤮𞤲𞤭 𞤲𞤮𞤳𞥆𞤵 𞤯𞤮 𞤺𞤮𞤤𞥆𞤫 𞤲'𞤦𞤢𞤯𞤢𞤼𞤢 𞤲'𞤺𞤢𞤥 𞤴𞤢𞤸-𞤲'𞤺𞤢𞤪𞤼𞤢𞥄 𞤼𞤮 𞤂𞤫𞤾𞤢𞤲𞤼. 𞤉 𞤲'𞤣𞤫𞤪 𞤂𞤢𞥄𞤥𞤵 𞤑𞤫𞤧𞤵 𞤲'𞤺𞤵𞥅⹁ 𞤬𞤭𞤪𞤢𞥄𞤱𞤲𞤢𞥄𞤶𞤭 𞤳𞤫𞥅𞤱𞤯𞤭 𞤳𞤵𞥅𞤼𞤮𞤪𞤭𞥅𞤥𞤢 𞤳𞤮𞤲𞤵 𞤃𞤭𞤧𞤪𞤢 𞤣𞤢𞤪𞤭𞥅𞤯𞤮 𞤲'𞤺𞤢𞤥 𞤸𞤢𞤩𞤼𞤢𞥄𞤣𞤫 𞤫 𞤸𞤫𞤩𞤼𞤵𞤣𞤫 𞤑𞤵𞥃 𞤫 𞤺𞤫𞤯𞤫 𞤂𞤫𞤾𞤢𞤲𞤼.

𞤑𞤢𞤪𞤢𞤤𞥆𞤢𞥄𞤺𞤢𞤤⹁ 𞤧𞤢𞤬𞤢𞥄𞤪𞤢 𞤫 𞤸𞤭𞥅𞤧𞤢

𞤉 𞤲'𞤣𞤫𞤪 𞤳𞤢𞤪𞤢𞤤𞥆𞤢𞥄𞤺𞤢𞤤⹁ 𞤧𞤢𞤬𞤢𞥄𞤪𞤢⹁ 𞤫 𞤸𞤭𞥅𞤧𞤢⹁ 𞤃𞤭𞤧𞤪𞤢 𞤩𞤮𞥅𞤴𞤯𞤮 𞤸𞤫𞤩𞤭𞥅 𞤼𞤮𞤤𞤲𞤮 𞤩𞤵𞤪𞤯𞤮 𞤼𞤮𞥅𞤱𞤣𞤫 𞤫 𞤰𞤫𞤤𞥆𞤭𞤼𞤢𞥄𞤪𞤫 𞤫 𞤧𞤮𞤬𞤼𞤭𞤲𞤢𞥄𞤪𞤫. 𞤉𞤥𞤨𞤭𞤪𞤭𞤧𞤥 𞤢𞥄𞤣𞤢𞥄𞤶𞤭⹁ 𞤸𞤮𞤲𞤮 𞤲𞤮 𞤧𞤫𞥅𞤣𞤢𞥄 𞤫 𞤨𞤢𞤨𞤭𞤪𞤵𞤧 𞤉𞤣𞤱𞤭𞤲 𞤅𞤥𞤭𞤼𞤸 𞤫 𞤉𞤦𞤫𞤪𞤧 (𞤸𞤫𞤣𞥆𞤫 𞥑𞥖𞥐𞥐 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄)⹁ 𞤢𞤣𞤭𞥅 𞤧𞤭𞤬𞤮𞤪𞤫𞥅𞤣𞤫 𞤳𞤮 𞤃𞤭𞤧𞤪𞤢. 𞤃𞤭𞤧𞤪𞤢𞤲𞤢𞥄𞤩𞤫 𞤲'𞤦𞤢𞤯𞤭𞥅 𞤢𞤤𞤳𞤵𞤤𞤫 𞤥𞤵𞤥 𞤫𞤲 𞤫 𞤲'𞤦𞤢𞤴𞤣𞤭 𞤼𞤮𞤩𞥆𞤫𞤪𞤫 𞤥𞤵𞤥 𞤫𞤲.

𞤓𞤥𞥆𞤢𞤼𞤮𞤪𞤫

𞤖𞤭𞥅𞤧𞤢𞥄𞤶𞤭 𞤥𞤢𞤱𞤲𞤵𞤺𞤮𞤤 𞤴𞤭𞤥𞤩𞤫 𞤭𞤲𞤢 𞤷𞤫𞥅𞤪𞤼𞤭 𞤺𞤭𞤤𞤢 𞤫 𞤥𞤭𞤤𞤭𞤴𞤮𞤽𞤢𞥄𞤶𞤭 𞥑 𞤸𞤢𞥄 𞥑⹁𞥕 𞤫 𞤲'𞤣𞤫𞤪 𞤵𞤶𞤵𞤲𞥆𞤢𞥄𞤶𞤫 𞥓𞤩𞤭𞥅𞤪𞤫 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄 𞤸𞤢𞥄 𞤫 𞤥𞤢 𞤢 𞤼𞤢𞤱 𞤥𞤭𞤤𞤭𞤴𞤮𞤽𞤢𞥄𞤶𞤭 𞥒 𞤸𞤢𞥄 𞥓 𞤫 𞤲'𞤣𞤫𞤪 𞤵𞤶𞤵𞤲𞥆𞤢𞥄𞤶𞤫 𞥑𞤩𞤭𞥅𞤪𞤫 𞤳𞤮 𞤢𞤣𞤭𞥅 𞤶𞤭𞤦𞤭𞤲𞤫𞥅𞤣𞤫 𞤋𞥅𞤧𞤢𞥄⹁ 𞤸𞤢𞤣𞤫 𞤥𞤵𞤥 𞤫𞤲 𞤩𞤫𞤴𞤣𞤢𞥄𞤣𞤫 𞤲𞤮 𞤬𞤫𞥅𞤱𞤭 𞤸𞤢𞥄 𞤶𞤮𞥅𞤬𞤲𞤭𞤪𞤣𞤫 𞤵𞤶𞤵𞤲𞤫𞤪𞤫 𞤲'𞤣𞤫𞥅. [𞥑𞥙𞥘]

𞤀𞤪𞤳𞤫𞤱𞤮𞤺𞤫𞤲𞤫𞤼𞤭𞤳

𞤉 𞤱𞤭𞤴𞤣𞤫 𞤣𞤢𞥄𞤪𞤼𞤮𞥅𞤱𞤮 𞤦𞤭𞤴𞤫𞤼𞤫𞥅𞤯𞤮 𞤏𞤭𞤤𞥆𞤭𞤢𞤥 𞤅𞤼𞤭𞤫𞤦𞤤𞤭𞤲'𞤺 𞤫 𞤢𞤪𞤳𞤫𞤱𞤮𞤤𞤮𞤧 𞤦𞤭𞤴𞤫𞤼𞤫𞥅𞤯𞤮 𞤅𞤵𞤧𞤢𞤲 𞤐. 𞤖𞤫𞤤𞤬𞤼⹁ 𞤱𞤭𞤯𞤼𞤮𞥅𞤶𞤭 𞤀𞤁𞤐 𞤤𞤵𞥅𞤪𞤮𞤲'𞤣𞤭𞤪𞤯𞤭 𞤫 𞤣𞤮𞤱 𞤲'𞤦𞤢𞤴𞤣𞤭𞥅𞤶𞤭 𞤼𞤢𞥄𞤪𞤭𞥅𞤲'𞤣𞤭 𞤳𞤮 𞤩𞤮𞥅𞤴𞤢𞥄𞤲𞤭 𞤳𞤮𞥅⹁ 𞤳𞤮 𞤱𞤢𞤴𞤭 𞤲𞤮 𞤥𞤵𞤥𞥆𞤭𞥅𞤶𞤭 𞤤𞤢𞥄𞤥𞤯𞤮 𞤀𞤥𞤢𞤪𞤲𞤢⹁ 𞤢𞤣𞥆𞤢𞤲𞤭𞥅 𞤽𞤢𞤳𞥆𞤫𞥅𞤲'𞤣𞤫 𞤲𞤢𞤲𞤮𞤲'𞤣𞤭𞤪𞤢𞤤 𞤫 𞤼𞤢𞥄𞤪𞤭𞥅𞤲'𞤣𞤭 𞤃𞤭𞤧𞤪𞤢𞤲𞤢𞥄𞤩𞤫 𞤩𞤮𞥅𞤴𞤩𞤫 𞤫 𞤭𞤱𞤣𞤭 𞤥𞤵𞤥 𞤫𞤲 . [𞥑𞥙𞥙]

𞤁𞤢𞥄𞤪𞤼𞤮𞤤 𞤪𞤫𞤲𞤣𞤮 𞤃𞤭𞤧𞤪𞤢 𞤩𞤮𞥅𞤴𞤯𞤮 𞤭𞤲𞤢 𞤸𞤫𞤣𞥆𞤭𞥅 𞤫 𞤬𞤢𞤲𞥆𞤵 𞤰𞤫𞤤𞥆𞤭𞤼𞤮𞥅𞤱𞤮⹁ 𞤭𞤲𞤢 𞤶𞤮𞤳𞥆𞤮𞤲'𞤣𞤭𞤪𞤭 𞤫 𞤬𞤢𞥄𞤥𞤣𞤫 𞤺𞤫𞤯𞤫 𞤣𞤫𞤥𞤮𞤳𞤢𞤪𞤢𞥄𞤧𞤭 𞤶𞤮𞤳𞥆𞤮𞤲'𞤣𞤭𞤪𞤯𞤫 𞤀𞤬𞤪𞤭𞤳 𞤫 𞤌𞤪𞤮𞤨. 𞤖𞤢𞥄 𞤸𞤢𞤲𞤣𞤫⹁ 𞤤𞤭𞤥𞤮𞥅𞤪𞤫 𞤱𞤭𞤯𞤼𞤮𞥅𞤶𞤭 𞤢𞤁𞤐𞤀 𞤫 𞤲'𞤣𞤫𞤪 𞤺𞤫𞤲𞤮𞤥𞤫-𞤱𞤭𞤣𞤫 𞤫 𞤲'𞤦𞤢𞤴𞤣𞤭𞥅𞤶𞤭 𞤩𞤮𞥅𞤴𞤯𞤭 𞤵𞤥𞥆𞤮𞤪𞤭𞥅𞤯𞤭 𞤉𞤶𞤭𞤨𞤼 𞤫 𞤅𞤵𞤣𞤢𞤲 𞤭𞤲𞤢 𞤳𞤫𞤣𞥆𞤭𞥅 𞤭𞤲𞤢 𞤨𞤢𞤥𞤯𞤭⹁ 𞤸𞤢𞤴 𞤧𞤮 𞤼𞤢𞤱𞤭𞥅 𞤲𞤮𞥅𞤲 𞤱𞤭𞤯𞤼𞤮𞥅𞤶𞤭 𞤳𞤮 𞤬𞤢𞥄𞤼𞤭 𞤫 𞤸𞤢𞤨𞤤𞤮𞤺𞤪𞤮𞤵𞤨𞤧 𞤵𞤲𞤭𞤨𞤢𞤪𞤫𞤲𞤼𞤢𞤤 𞤫 𞤲'𞤣𞤫𞤪 𞤴𞤭𞤥𞤩𞤫 𞤩𞤮𞥅𞤴𞤩𞤫 𞤲'𞤦𞤢𞤯𞤢𞥄𞤥𞤢 𞤤𞤢𞥄𞤦𞤭 𞤳𞤫𞥅𞤱𞤯𞤭⹁ 𞤭𞤲𞤢 𞤸𞤮𞤤𞥆𞤭𞤼𞤢 𞤲𞤮 𞤬𞤫𞥅𞤱𞤭 𞤶𞤮𞤳𞥆𞤮𞤲'𞤣𞤭𞤪𞤢𞤤 𞤫 𞤣𞤫𞤲𞤼𞤫 𞤺𞤮𞤯𞥆𞤫 𞤀𞤬𞤪𞤭𞤳 𞤫 𞤌𞤪𞤮𞤨.

𞤐𞤣𞤮𞤲𞤣𞤭

𞤆𞤭𞤲𞤢𞤤 𞤫 𞤥𞤮𞤲𞤭𞤥𞤢𞥄𞤶𞤭 𞤃𞤭𞤧𞤪𞤢 𞤩𞤮𞥅𞤴𞤯𞤮 𞤭𞤲𞤢 𞤲'𞤶𞤮𞤺𞤭𞤲𞤮𞥅 𞤲'𞤦𞤢𞤴𞤣𞤭 𞤣𞤵𞥅𞤥𞤭𞥅𞤲'𞤣𞤭 𞤫 𞤲'𞤣𞤫𞤪 𞤱𞤭𞤲𞤣𞤫𞤪𞤫 𞤲'𞤣𞤫𞥅. 𞤔𞤢𞥄𞤲'𞤦𞤢𞤪𞤢𞥄𞤺𞤢𞤤 𞤃𞤭𞤧𞤪𞤢 𞤭𞤲𞤢 𞤶𞤮𞤺𞤭𞤲𞤮𞥅 𞤦𞤢𞤼𞥆𞤫 𞤳𞤫𞥅𞤱𞤯𞤫 𞤫 𞤂𞤢𞥄𞤥𞤵 𞤑𞤵𞥃 𞤫 𞤃𞤫𞤪𞤮𞤫 𞤲'𞤣𞤫 𞤼𞤢𞤱𞤲𞤮𞥅 𞤭𞤲𞤢 𞤶𞤢𞤩𞤭 𞤣𞤭𞥅𞤲𞤫 𞤫 𞤥𞤢𞤸𞤣𞤭 𞤃𞤭𞤧𞤪𞤢 (𞤼𞤫𞥅𞤥𞤫𞤣𞥆𞤫 𞤨𞤭𞤪𞤢𞤥𞤭𞤣 (𞥖 𞤸𞤢𞥄 𞥓𞥐 𞤥𞤫𞥅𞤼𞤫𞥅𞤪 𞤼𞤮𞥅𞤱𞤯𞤮) 𞤭𞤲𞤢 𞤥𞤢𞤸𞤢𞥄 𞤫 𞤃𞤭𞤧𞤪𞤢/𞤅𞤵𞤣𞤢𞥄𞤲)⹁ 𞤳𞤢𞤥 𞤫 𞤸𞤵𞥅𞤼𞤮𞤪𞤢𞥄𞤣𞤫 𞤦𞤭𞤲𞤣𞤮𞤤 𞤃𞤭𞤧𞤪𞤢 𞤲'𞤺𞤢𞤥 𞤱𞤮𞤲'𞤣𞤫 𞤼𞤵𞥅𞤻𞤮𞤪𞤺𞤢𞤤 𞤦𞤭𞤲𞤣𞤮𞤤 𞤃𞤫𞤪𞤮𞤭𞤼𞤭𞤳. [𞥒𞥐𞥙] 𞤃𞤫𞤪𞤮𞤭𞤼𞤭𞤳 𞤳𞤮 𞤯𞤫𞤥𞤲'𞤺𞤢𞤤 𞤦𞤭𞤲𞤣𞤮𞤤 𞤩𞤵𞤪𞤲'𞤺𞤢𞤤 𞤩𞤮𞥅𞤴𞤣𞤫 𞤫 𞤲'𞤣𞤫𞤪 𞤀𞤬𞤪𞤭𞤳⹁ 𞤷𞤢𞤺𞥆𞤢𞤤 𞤯𞤫𞤥𞤲'𞤺𞤢𞤤 𞤉𞤶𞤭𞤨𞤼⹁ 𞤲'𞤺𞤢𞤤 𞤸𞤵𞥅𞤼𞤮𞤪𞤼𞤫𞤲𞤮𞥅 𞤳𞤮 𞤺𞤭𞤤𞤢 𞤫 𞤼𞤫𞥅𞤥𞤭𞤲𞤢𞤲𞤣𞤫 𞥒𞤩𞤭𞥅𞤪𞤫 𞤸𞤢𞤣𞤫 𞤋𞥅𞤧𞤢𞥄 𞤸𞤢𞥄 𞤫 𞤬𞤵𞤯𞥆𞤮𞥅𞤣𞤫 𞤼𞤫𞥅𞤥𞤭𞤲𞤢𞤲𞤣𞤫 𞥕𞤩𞤭𞥅𞤪𞤫 𞤷𞤢𞤺𞥆𞤢𞤤 𞤋𞥅𞤧𞤢𞥄 [𞥒𞥑𞥐] 𞤁𞤫𞤱𞤢𞤤 𞤤𞤢𞥄𞤥𞤯𞤮 𞤣𞤫𞤦𞥆𞤮 𞤦𞤭𞤴𞤫𞤼𞤫𞥅𞤯𞤮 𞤋𞤧𞤭𞤧⹁ 𞤴𞤫𞤪𞤵⹁ 𞤱𞤮𞤲𞤼𞤭 𞤳𞤮 𞤩𞤵𞤪𞤭 𞤸𞤫𞥅𞤱𞤣𞤫 𞤫 𞤤𞤢𞥄𞤥𞤵 𞤈𞤮𞥅𞤥 ⹁ 𞤲'𞤣𞤫 𞤼𞤢𞤱𞤲𞤮𞥅 𞤮𞤦𞤫𞤤𞤭𞤧𞤳 𞤫𞤲 𞤫 𞤺𞤫𞤯𞤫 𞤺𞤮𞤯𞥆𞤫 𞤭𞤲𞤢 𞤲'𞤶𞤢𞤤𞤼𞤭𞤲𞤫𞥅 𞤼𞤮 𞤈𞤮𞤥𞤫. [𞥒𞥑𞥑] 𞤈𞤮𞥅𞤥𞤲𞤢𞥄𞤩𞤫 𞤳𞤢𞤣𞤭 𞤭𞤲𞤢 𞤲'𞤺𞤢𞤣𞥆𞤢 𞤳𞤢𞤩𞤭𞤪𞤯𞤫 𞤥𞤢𞤸𞤣𞤭 𞤵𞤥𞥆𞤮𞤪𞤢𞥄𞤣𞤫 𞤉𞤶𞤭𞤨𞤼 𞤲'𞤺𞤢𞤥 𞤥𞤢𞤸𞤣𞤫 𞤷𞤵𞥅𞤯𞤭 𞤲𞤮 𞤃𞤭𞤧𞤪𞤢 𞤲𞤭𞥅. 𞤁𞤢𞥄𞤪𞤼𞤭𞤴𞤢𞤲𞤳𞤮𞥅𞤩𞤫 𞤢𞤣𞤢𞤲𞤩𞤫 𞤳𞤮 𞤱𞤢𞤴𞤭 𞤲𞤮 𞤖𞤫𞤪𞤮𞤣𞤮𞤼𞤵𞤧⹁ 𞤅𞤼𞤪𞤢𞤦𞤮𞤲⹁ 𞤫 𞤁𞤭𞤮𞤣𞤮𞤪𞤵𞤧 𞤥𞤮 𞤅𞤭𞤧𞤭𞤤𞤭 𞤲'𞤶𞤢𞤲𞤺𞤭𞥅⹁ 𞤲'𞤦𞤭𞤲𞤣𞤭 𞤳𞤮 𞤬𞤢𞤴𞤼𞤭 𞤫 𞤤𞤫𞤴𞤣𞤭 𞤲'𞤣𞤭𞥅⹁ 𞤲'𞤣𞤭 𞤈𞤮𞥅𞤥𞤲𞤢𞥄𞤩𞤫 𞤲'𞤺𞤢𞤪𞤭 𞤴𞤭𞤴𞤪𞤵𞤣𞤫 𞤯𞤵𞤥 𞤲𞤮 𞤲𞤮𞤳𞥆𞤵 𞤧𞤭𞤪𞤤𞤵 𞤲𞤭𞥅.