Gammbi/adlam

Alkule lateŋ

𞤀𞤣𞤤𞤢𞤥 𞤆𞤵𞤤𞤢𞤪

‮𞤐'𞤁𞤫𞤲𞤣𞤢𞥄𞤲'𞤣𞤭 𞤤𞤭𞤧𞤤𞤢𞤥𞤫𞥅𞤪𞤭 𞤘𞤢𞤥𞤦𞤭
Islamic Republic of the Gambia

‮𞤔𞤮𞤦𞥆𞤭𞤼𞤮𞥅𞤪𞤫 𞤤𞤫𞤴𞤣𞤭: 𞤎𞤫𞤤𞥆𞤭𞤼𞤢𞥄𞤪𞤫⹁ 𞤔𞤢𞤥⹁ 𞤒𞤢𞥄𞤶𞤫𞥅𞤲'𞤣𞤫
‮ 𞤍𞤫𞤥𞤲'𞤺𞤢𞤤 𞤤𞤢𞥄𞤱𞤯𞤭𞤲𞤢𞥄𞤲'𞤺𞤢𞤤	𞤉𞤲𞤺𞤫𞤤𞤫𞥅𞤪𞤫
𞤂𞤢𞥄𞤥𞤮𞤪𞤣𞤫	𞤄𞤢𞤲𞤶𞤵𞤤𞤵
𞤅𞤢𞥄𞤪𞤫 𞤩𞤵𞤪𞤲'𞤣𞤫 𞤷𞤢ʼ𞤫 𞤬𞤵𞥅 𞤥𞤢𞤱𞤲𞤵𞤣𞤫	𞤅𞤫𞤪𞥆𞤫𞤳𞤵𞤲'𞤣𞤢

‮𞤘𞤢𞤥𞤦𞤭 (𞤫𞤲. 𞤘𞤢𞤲'𞤦𞤭𞤢) 𞤳𞤮 𞤤𞤫𞤴𞤣𞤭 𞤼𞤮𞤳𞤮𞥅𞤧𞤭𞤪𞤭 𞤤𞤮𞤥𞤦𞤭𞥅𞤲'𞤣𞤭 𞤫 𞤲'𞤣𞤫𞤪 𞤅𞤫𞤲𞤫𞤺𞤢𞥄𞤤⹁ 𞤼𞤮 𞤸𞤭𞥅𞤪𞤲𞤢𞥄𞤲'𞤺𞤫 𞤀𞤬𞤭𞤪𞤭𞤳. 𞤐'𞤄𞤫𞤪𞤼𞤵𞤣𞤭 𞤤𞤫𞤴𞤣𞤭 𞤲'𞤣𞤭𞤲 𞤳𞤮 𞥑𞥑.𞥒𞥙𞥕 𞤳𞤥𞥒⹁ 𞤶𞤢𞤥𞤢𞥄 𞤸𞤮𞤯𞤵𞤯𞤮 𞤫 𞤥𞤢𞤴𞤪𞤭 𞤲𞤮 𞤸𞤫𞤱𞤼𞤢𞤴𞤲𞤮𞥅 𞤬𞤫𞤱𞤲'𞤣𞤮 𞤸𞤭𞤼𞤢𞥄𞤲'𞤣𞤫 𞥒𞥐𞥑𞥓 𞤴𞤭𞤥𞤩𞤫 𞥑.𞥘𞥘𞥒.𞥔𞥕𞥐. 𞤂𞤢𞥄𞤥𞤮𞤪𞤣𞤫 (𞤳𞤢𞤨𞤭𞤼𞤢𞤤) 𞤤𞤫𞤴𞤣𞤭 𞤘𞤢𞤥𞤦𞤭 𞤴𞤮 𞤄𞤢𞤲𞤶𞤵𞤤𞤵 (𞤫𞤲. 𞤄𞤢𞤲'𞤶𞤵𞤤). 𞤖𞤭𞤲'𞤣𞤭 𞤶𞤫𞤴𞤢𞥄 𞤫 𞤤𞤫𞤴𞤯𞤫 𞤕𞤉𞤁𞤉𞤀𞤌 (𞤉𞤕𞤌𞤏𞤀𞤅).

‮𞤔𞤵𞤦𞥆𞤢𞤲𞤣𞤫 𞤫 𞤼𞤢𞥄𞤪𞤭𞥅𞤿𞤢 𞤤𞤫𞤴𞤣𞤭 𞤲'𞤣𞤭𞥅

‮𞤘𞤢𞤥𞤦𞤭 𞤸𞤭𞤲𞤮 𞤶𞤫𞤴𞤢𞤲𞤮𞥅 𞤫 𞤤𞤢𞥄𞤥𞤢𞤼𞤫𞥅𞤪𞤭 𞤃𞤢𞥄𞤤𞤭 𞤲'𞤣𞤭𞤲.

𞤉 𞤸𞤭𞤼𞤢𞥄𞤲'𞤣𞤫 𞥑𞥔𞥕𞥕⹁ 𞤆𞤮𞤪𞤼𞤮𞤳𞤫𞥅𞤧𞤵𞥅𞤩𞤫 𞤩𞤫𞤲 𞤬𞤵𞤯𞥆𞤭𞤲𞤮 𞤶𞤮𞤯𞥆𞤭𞤲'𞤣𞤫 𞤳𞤮𞤲𞤼𞤵𞤱𞤢𞥄𞤪𞤵𞥅𞤶𞤭 𞤫 𞤼𞤢𞤳𞥆𞤮 𞤥𞤢𞥄𞤴𞤮 𞤘𞤢𞤥𞤦𞤭 𞤲'𞤺𞤮𞤲⹁ 𞤬𞤭𞥅 𞤴𞤵𞤩𞥆𞤭𞤲'𞤺𞤮𞤤 𞤲'𞤺𞤫𞥅𞤴𞤺𞤵 𞤶𞤭𞤴𞤢𞥄𞤩𞤫 𞤩𞤢𞤤𞤫𞥅𞤩𞤫. 𞤉 𞤸𞤭𞤼𞤢𞥄𞤲'𞤣𞤫 𞥑𞥗𞥒𞥓⹁ 𞤉𞤲𞤺𞤫𞤤𞤫𞥅𞤩𞤫 𞤩𞤫𞤲 𞤱𞤮𞤲𞤭 𞤫 𞤧𞤮𞥅𞤣𞤵𞤣𞤫 𞤤𞤫𞤴𞤯𞤫𞥅𞤤𞤫 𞤫 𞤲'𞤣𞤫𞤪 𞤘𞤢𞤥𞤦𞤭. 𞤁𞤮𞤴-𞤣𞤮𞤴⹁ 𞤩𞤫 𞤶𞤮𞥅𞤯𞤭𞥅 𞤫 𞤳𞤢𞥄𞤤 𞤤𞤫𞤴𞤳𞤢𞤤 𞤤𞤮𞤥𞤦𞤭𞥅𞤳𞤢𞤤 𞤫 𞤲'𞤣𞤫𞤪 𞤅𞤫𞤲𞤫𞤺𞤢𞤤⹁ 𞤼𞤮 𞤊𞤢𞤪𞤢𞤲𞤧𞤭𞥅𞤩𞤫 𞤩𞤫𞤲 𞤶𞤮𞥅𞤯𞤭𞤲𞤮𞥅. 𞤇𞤫𞤲 𞤫𞤼𞤭𞥅 𞤸𞤢𞥄 𞤪𞤮𞤲𞤳𞤭 𞤪𞤭𞥅𞤱𞤵𞤣𞤫 𞤉𞤲𞤺𞤫𞤤𞤫𞥅𞤩𞤫 𞤩𞤫𞤲⹁ 𞤩𞤫 𞤧𞤭𞥅𞤬𞤭𞤣𞤭 𞤫 𞤥𞤢𞤩𞥆𞤫 𞤲𞤢𞤲𞤮𞤲'𞤣𞤭𞤪𞤢𞤤 𞥑𞥘𞥘𞥙. 𞤋𞤼𞥆𞤵𞤣𞤫 𞥑𞥘𞥙𞥔 𞤘𞤢𞤥𞤦𞤭 𞤱𞤮𞤲𞤼𞤭 𞤤𞤫𞤴𞤣𞤭 𞤸𞤢𞤤𞤬𞤭𞤲𞤢𞥄𞤲'𞤣𞤭 𞤤𞤢𞥄𞤥𞤵 𞤄𞤭𞤪𞤼𞤭𞤲𞤳𞤫ʼ𞤫𞤲.

𞤘𞤢𞤥𞤦𞤭 𞤸𞤫𞤩𞤼𞤭 𞤸𞤮𞥅𞤪𞤫 𞤥𞤵𞤥 𞤫 𞤸𞤭𞤼𞤢𞥄𞤲'𞤣𞤫 𞥑𞥙𞥖𞥕⹁ 𞤁𞤢𞤱𞤣𞤢 𞤑𞤢𞤴𞤪𞤢𞤦𞤢 𞤔𞤢𞥄𞤱𞤢𞤪𞤢 𞤤𞤢𞥄𞤼𞤭𞥅 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤢𞤪𞤢𞤲𞤮 𞤮𞤲. 𞤉 𞤸𞤭𞤼𞤢𞥄𞤲'𞤣𞤫 𞥑𞥙𞥘𞥑⹁ 𞤳𞤮𞤲𞤭𞤲𞤳𞤫𞥅𞤶𞤮 𞤱𞤭ʼ𞤫𞤼𞤫𞥅𞤯𞤮 𞤑𞤵𞤳𞤮𞤴 𞤅𞤢𞤥𞤦𞤢 𞤬𞤢𞥄𞤤𞤢𞥄 𞤤𞤭𞤩𞤵𞤣𞤫 𞤤𞤢𞥄𞤥𞤵 𞤥𞤢𞤳𞥆𞤮 𞤳𞤮𞤲𞤮 𞤅𞤫𞤲𞤫𞤺𞤢𞤤 𞤭𞤥𞥆𞤭𞤲𞤭 𞤳𞤮𞤲𞤭𞤲𞤳𞤮𞥅𞤩𞤫 𞤥𞤵𞤥⹁ 𞤩𞤫𞤲 𞤴𞤢𞤸𞤭 𞤘𞤢𞤥𞤦𞤭 𞤢𞤪𞤼𞤭𞤪𞤭 𞤔𞤢𞥄𞤱𞤢𞤪𞤢 𞤳𞤢 𞤤𞤢𞥄𞤥𞤵. 𞤌𞤲𞤼𞤵𞤥𞤢 𞤅𞤫𞤲𞤫𞤺𞤢𞤤 𞤫 𞤘𞤢𞤥𞤦𞤭 𞤸𞤢𞤱𞤼𞤭𞤼𞤭 𞤱𞤢𞤯𞤭 𞤳𞤮𞤲𞤬𞤫𞤣𞤫𞤪𞤢𞤧𞤭𞤴𞤮𞤲 𞤅𞤫𞤲𞤫𞤺𞤢𞤥𞤦𞤭 (𞤳𞤢𞤱𞤼𞤭𞤼𞤢𞤤 𞤤𞤫𞤴𞤯𞤫 𞤯𞤭𞤯𞤭) 𞤳𞤮𞤲𞤮 𞤲'𞤺𞤢𞤤 𞤳𞤢𞤱𞤼𞤭𞤼𞤢𞤤 𞤪𞤮𞤲𞤳𞤭 𞤻𞤭𞥅𞤩𞤵𞤣𞤫⹁ 𞤲'𞤺𞤢𞤤 𞤬𞤮𞤺𞤭 𞥑𞥙𞥘𞥙.

𞤙𞤢𞤲𞤣𞤫 𞥒𞥒 𞤴𞤵𞤤𞤭𞤴𞤵𞤸𞤵 (𞤥𞤮𞤪𞤧𞤮) 𞥑𞥙𞥙𞥔 𞤧𞤫𞤲𞤼𞤫𞤪𞤫 𞤮𞤬𞤭𞤧𞤭𞤴𞤫𞥅𞤩𞤫 𞤲'𞤣𞤫 𞤳𞤢𞤨𞤭𞤼𞤫𞤲 𞤒𞤢𞥄𞤴𞤢𞥄 𞤔𞤢𞤥𞥆𞤫 𞤢𞤪𞤣𞤭𞥅 𞤰𞤫𞤼𞥆𞤭 𞤤𞤢𞥄𞤥𞤵 𞤲'𞤺𞤵𞤲 𞤫 𞤶𞤵𞥅𞤯𞤫 𞤔𞤢𞥄𞤱𞤢𞤪𞤢. 𞤖𞤭𞤲𞤮 𞤶𞤫𞤴𞤢𞥄 𞤫 𞤧𞤢𞤦𞤢𞤦𞤫𞥅𞤶𞤭 𞤮𞤲 𞤳𞤵𞥅𞤣𞤫𞤼𞤢𞥄 𞤪𞤮𞤲𞤳𞤵𞤺𞤮𞤤 𞤔𞤢𞥄𞤱𞤢𞤪𞤢 𞤸𞤵𞤥𞤲𞤢𞤲'𞤣𞤫 𞤷𞤢𞤯𞤫𞥅𞤤𞤫 𞤬𞤢𞤺𞥆𞤵𞤣𞤵𞤴𞤢𞤲𞤳𞤮𞥅𞤶𞤫 𞤤𞤫𞤴𞤣𞤭 𞤲'𞤣𞤭𞤲 𞤺𞤭𞤤𞤢 𞤶𞤫𞤴𞤼𞤢𞤤 𞤸𞤮𞥅𞤪𞤫 𞤥𞤢𞤴𞤪𞤭.

𞤘𞤭𞤤𞤢 𞥑𞥙𞥙𞥔 𞤳𞤮 𞤒𞤢𞥄𞤴𞤢𞥄 𞤔𞤢𞤥𞥆𞤫 𞤼𞤵𞤲 𞤤𞤢𞥄𞤥𞤭𞥅 𞤧𞤢𞤦𞤵 𞤱𞤮𞤲𞤣𞤫 𞤳𞤢𞤤𞤢 𞤱𞤮𞥅𞤼𞤫 𞤲𞤮 𞤱𞤮𞥅𞤣𞤭⹁ 𞤯𞤵𞥅𞤯𞤢𞤤 𞤬𞤫𞤣𞥆𞤫𞥅𞤶𞤭 𞤣𞤢𞤱𞤪𞤮𞤴𞤢𞤲𞤳𞤮𞥅𞤶𞤭 𞤲𞤮 𞤱𞤮𞥅𞤣𞤭⹁ 𞤳𞤮 𞤳𞤢𞤲𞤳𞤮 𞤼𞤵𞤲 𞤬𞤮𞥅𞤤𞤢𞤼𞤢 𞤳𞤢 𞤱𞤮𞥅𞤼𞤫. 𞤂𞤢𞥄𞤥𞤵 𞤘𞤢𞤥𞤦𞤭 𞤲'𞤺𞤵𞤲 𞤲𞤮 𞤱𞤮𞥅𞤱𞤭 𞤧𞤭𞤬𞤮𞤪𞤫𞥅𞤣𞤫 𞤦𞤮𞤲𞤢𞤲𞤣𞤫𞥅𞤶𞤭 𞤯𞤵𞥅𞤯𞤵𞤯𞤭 𞤬𞤫𞥅𞤱𞤣𞤫 𞤶𞤮𞤶𞥆𞤢𞤲𞤯𞤫 𞤲𞤫𞤯𞥆𞤢𞤲𞤳𞤫⹁ 𞤼𞤫𞥅𞤽𞤼𞤭𞥅 𞤲𞤮𞤲 𞤲'𞤣𞤭𞤥𞤢𞥄𞤳𞤵 𞤶𞤢𞥄𞤴𞤲'𞤣𞤫𞥅𞤶𞤭 (𞤶𞤵𞤪𞤲𞤢𞤤𞤵𞥅𞤶𞤭). 𞤒𞤢𞥄𞤴𞤢𞥄 𞤔𞤢𞤥𞥆𞤫 𞤲𞤮 𞤢𞤲𞤣𞤭𞤪𞤢𞥄 𞤳𞤢𞤣𞤭 𞤺𞤭𞤺𞥆𞤮𞤤 𞤩𞤵𞤪𞤼𞤵𞤲'𞤺𞤮𞤤 𞤱𞤮𞤲𞤢𞤲'𞤣𞤫 𞤱𞤢𞤷𞥆𞤮𞥅𞤪𞤫 𞤫 𞤢𞤻𞤵𞤺𞤮𞤤 𞤽𞤭𞤻𞤫𞤪𞤫.

‮𞤂𞤫𞤰𞥆𞤭 𞤫 𞤯𞤫𞤥𞤯𞤫

‮𞤂𞤫𞤰𞥆𞤭 𞤘𞤢𞤥𞤦𞤭 𞤯𞤭𞤲 𞤧𞤫𞥅𞤪𞤼𞤢𞥄 𞤫 𞤤𞤫𞤰𞥆𞤭 𞤤𞤫𞤴𞤯𞤫 𞤼𞤢𞤳𞥆𞤭𞥅𞤯𞤫 𞤯𞤮𞤲 𞤯𞤫𞤲: 𞤅𞤫𞤩𞥆𞤫 (𞤃𞤢𞤲𞤣𞤭𞤲𞤳𞤮𞥅𞤩𞤫)⹁ 𞤐'𞤔𞤮𞤤𞤬𞤵𞤩𞤫⹁ 𞤊𞤵𞤤𞤩𞤫⹁ 𞤅𞤢𞤪𞤢𞤲𞤳𞤵𞤤𞥆𞤫𞥅𞤩𞤫⹁ 𞤔𞤢𞥄𞤳𞤢𞤲𞤳𞤫𞥅𞤩𞤫⹁ 𞤔𞤮𞤤𞤢𞥄𞤩𞤫. 𞤍𞤵𞤥 𞤫 𞤱𞤮𞤲'𞤣𞤫 𞤳𞤮 𞤫𞤲𞤺𞤫𞤤𞤫𞥅𞤪𞤫 𞤼𞤵𞤲 𞤱𞤮𞤲𞤭 𞤯𞤫𞤥𞤲'𞤺𞤢𞤤 𞤤𞤢𞥄𞤱𞤯𞤭𞤲𞤢𞥄𞤲'𞤺𞤢𞤤 𞤲'𞤺𞤢𞤤⹁ 𞤳𞤮 𞤯𞤫𞥅 𞤯𞤮𞥅 𞤯𞤫𞤥𞤯𞤫 𞤼𞤢𞤼𞤭 𞤩𞤵𞤪𞤫𞤼𞤫𞥅 𞤱𞤮𞤱𞤤𞤫𞥅𞤣𞤫 𞤫 𞤤𞤫𞤴𞤣𞤭 𞤲'𞤣𞤭𞤲: 𞤥𞤢𞤲𞤣𞤭𞤲𞤳𞤮𞥅𞤪𞤫⹁ 𞤲'𞤶𞤮𞤤𞤬𞤮𞥅𞤪𞤫⹁ 𞤨𞤵𞤤𞤢𞥄𞤪. 𞤊𞤵𞤤𞤩𞤫 𞤘𞤢𞤥𞤦𞤭⹁ 𞤳𞤮 𞤩𞤵𞤪𞤭 𞤸𞤫𞥅𞤱𞤣𞤫 𞤳𞤮𞤲⹁ 𞤳𞤮 𞤊𞤭𞤪𞤣𞤵𞤲𞤳𞤮𞥅𞤩𞤫 (𞤊𞤵𞤤𞤢𞥄𞤣𞤵𞤲𞤢𞥄𞤩𞤫) 𞤳𞤮𞤲𞤮 𞤊𞤵𞤤𞤩𞤫 𞤊𞤵𞥅𞤼𞤢 𞤔𞤢𞤤𞤮𞥅 𞤳𞤢𞤣𞤭 𞤲𞤮 𞤸𞤫𞥅𞤱𞤭.

‮𞤘𞤢𞤤𞥆𞤵𞥅𞤪𞤫

• 𞤅𞤫𞤪𞥆𞤫𞤳𞤵𞤲'𞤣𞤢 𞥓𞥖𞥒.𞥙𞥘𞥖 (𞥒𞥐𞥑𞥓)
• 𞤄𞤪𞤭𞤳𞤢𞤥𞤢 𞥘𞥔.𞥖𞥐𞥘
• 𞤄𞤢𞤳𞤢𞤵 𞥕𞥓.𞥗𞥖𞥖
• 𞤄𞤢𞤲𞤶𞤵𞤤𞤵 𞥓𞥔.𞥘𞥒𞥘

‮𞤘𞤢𞤤𞥆𞤫𞤪𞤴

• 
  ‮𞤘𞤢𞤥𞤦𞤭
• 
  ‮𞤅𞤫𞤪𞤫𞤳𞤵𞤲'𞤣𞤢
• 
  ‮𞤄𞤪𞤭𞤳𞤢𞤥𞤢
• 
  ‮𞤄𞤢𞤳𞤢𞤵
• 
  ‮𞤄𞤢𞤲𞤶𞤵𞤤𞤵